Zdareńnie adbyłosia 20 lipienia. 38-hadovy Viačasłaŭ Savičaŭ apoŭnačy išoŭ pa Rečyckim praśpiekcie. Na budynku jon zaŭvažyŭ ściah.
«Ja byŭ vypiŭšy. Vyrašyŭ pravieryć svaje zdolnaści — ci daskoču da ściaha. Skoknuŭ, uchapiŭsia za jaho, dreŭka złamałasia, ściah upaŭ. Ja ŭbačyŭ minaka, jaki stajaŭ na prypynku, spužaŭsia i adpichnuŭ ściah nahoj», — tłumačyŭ na sudzie abvinavačany.
Minakom akazaŭsia supracoŭnik milicyi. Jon viartaŭsia z pracy i tut ža zatrymaŭ čałavieka.
«Ubačyŭ hramadzianina, jaki trymaŭ ściah, potym jon jaho adkinuŭ nahoj. Ja padyšoŭ, skazaŭ: «Milicyja». Mnie jon patłumačyŭ svaje dziejańni, što jamu nie padabajecca hety ściah. Prasiŭ jaho adpuścić. Ja vyklikaŭ narad i skazaŭ jamu, što kali nie padabajecca hety ściah — chaj jedzie ŭ inšuju krainu, tam budzie inšy ściah», — kazaŭ na sudzie milicyjant Piotr Račkoŭ.
Ściah naležaŭ kamunalnamu pradpryjemstvu, kaštavaŭ 21 rubiel. Abvinavačany kupiŭ i zanios im novy ściah.
Viačasłaŭ Savičaŭ skazaŭ, što raskajvajecca. Na śledstvie jon taksama kazaŭ, što sarvaŭ ściah, bo «ich zanadta šmat visieła pa horadzie», i što «trymajecca dalej ad palityki».
Prakurorka papikała abvinavačanaha tym, što jon nidzie nie pracuje. «Na što vy žyviacie? Čamu nie šukajecie narmalnuju pracu? Siamju nie płanujecie zavodzić? Ci dapamahajecie vy svaim baćkam? Čamu ŭ vas niama stałaha zarobku — vy ž mužčyna ŭ samym roskvicie sił!» — pytałasia prakurorka.
Jana prasiła pakarać abvinavačanaha hodam kałonii ahulnaha režymu. Sudździa padtrymała prapanovu.
Viačasłava Savičava ŭziali pad vartu ŭ zale suda.
