Kvoty na vytvorčaść ałkaholnaj pradukcyi — pakazčyk, za jakim pilna sočyć dziaržava. U 2021 ałkaholnymi fłahmanami ŭ našaj krainie zastajucca harełka (kvoty na vytvorčaść 109 507 000 litraŭ), vytvorčaść etyłavaha śpirtu (84 840 000 litraŭ) i fruktova-jahadnych vinaŭ, jakija ŭ narodzie nazyvajuć «čarniła» (49 215 000 litraŭ).
Namienkłatura pastajanna raście, užo ciapier kvoty na vytvorčaść kańjaku składajuć ni mnoha ni mała 6 690 000 litraŭ, viski — 2 340 000 litraŭ, kalvadosu — 160 000 litraŭ, tekiły — 145 000 litraŭ. Jość navat takija ekzatyčnyja pazicyi, jak «sadavina ŭ vinie fruktovym» (20 000 litraŭ).
Kolki atrymlivaje biudžet z akcyzaŭ na ałkahol i cyharety?
U 2018 hodzie ŭ biudžet krainy ad akcyzaŭ pastupiła ŭsiaho 2 młrd 600 młn rubloŭ. Ź ich — 1 młrd 4 młn skłali akcyzy na śpirtaźmiaščalnuju i ałkaholnuju pradukcyju, 863 młn — akcyzy na tytuniovuju pradukcyju i 733 młn skłali inšyja akcyzy (u pieršuju čarhu — na paliva).
U nastupnym, 2019 hodzie, srodki ad ałkaholnych akcyzaŭ pavialičylisia da 1 młrd 21 młn, roŭna da hetaj ža sumy (1 młrd 21 młn) padraśli pastupleńni ad akcyzaŭ na tytuń, a inšyja akcyzy pavialičylisia da 758 młn. Usiaho za 2019 hod atrymałasia 2 młrd 800 młn rubloŭ. Statystyka dachodaŭ ad akcyzaŭ na ałkahol i cyharety ŭ 2020 hodzie całkam paŭtaraje papiaredni hod, a voś inšyja akcyzy vyraśli ŭžo da 1 młrd 103 młn. Kali paličyć, ahułam za 2020 hod akcyzy pryciahnuli ŭ biudžet Biełarusi 3 młrd 144 młn rubloŭ.
Sa studzienia pa lipień 2021 hoda akcyzy prynieśli amal 1 młrd 996 młn rubloŭ, pryčym za studzień — lipień sabrana 61% udakładnienaha płana, a da kanca hoda płanujecca sabrać amal 3,3 młrd rubloŭ. Hetyja pakazčyki, miarkujučy pa dynamicy, buduć pieravykananyja. Uličvajučy, što ŭ hetym hodzie płan pa dachodach u respublikanski biudžet składaje 23 młrd rubloŭ, dachody ad akcyzaŭ ujaŭlajuć saboj značnuju častku pastupleńniaŭ.
Kudy iduć usie hetyja niemałyja hrošy? Prykładna stolki ž dziaržava vyłučyła z respublikanskaha biudžetu na padtrymku nacyjanalnaj ekanomiki ŭ 2020 hodzie — suma raschodaŭ skłała 3 młrd 494 młn rubloŭ. Heta tolki krychu bolš za toje, što dziaržava zarabiła na akcyzach. Pry hetym vialikaja dola ad hetych hrošaj idzie na padtrymku čaściakom stratnych pradpryjemstvaŭ sielskaj haspadarki, adznačajuć ekśpierty «Našych hrošaj».
