Raniej «Jeŭraopt» užo sprabavaŭ vyjści na IRO ŭ 2018 hodzie, ale kampaniju nie zadavoliła cana realizacyi akcyj, jakuju prapanavali brytancy — jana była, jak jany paličyli, zanizkaj.
Jak paviedamlajuć krynicy «Našaj Nivy», ciapier u «Jeŭraopta» moža nie być varyjantaŭ: u chutkim časie kampanii nieabchodna budzie hasić ablihacyi, raźmieščanyja ŭ Rasii. Pry hetym analityki sumniajucca, što heta možna zrabić biesprablemna.
Raniej u biznes-kołach chadzili čutki ab pieramovach «Jeŭraopta» i «Mahnita» ab prodažy biełaruskaj sietki.
Čytajcie taksama: Straty 126 miljonaŭ, u biznes-kołach kažuć pra mahčymy prodaž rasijskamu «Mahnitu». Što adbyvajecca ź Jeŭraoptam?
Kolki možna vyručyć za «Jeŭraopt» na IRO? Analityk Maksim Adaskievič aceńvaŭ košt «Jeŭraopta» ŭ 300-500 miljonaŭ.
Praŭda, vychad rytejlera na IRO budzie abciažarany situacyjaj u Biełarusi — analityki sychodziacca na dumcy, što vialikaha dyskontu «za znachodžańnie na vułkanie» nie paźbiehnuć.
«Šancy vyjści na biržu ŭ «Jeŭraopta» ŭ pryncypie jość, bo heta ŭsio ž pryvatnaja kampanija, z akcyjanierami, jakija žyvuć za miažoj, tamu naŭrad ci navat zachodnija inviestary nastolki masava paličać inviestycyi ŭ «Jeŭratorh» nieprymalnymi, jak heta było b, kali finansavańnie na zachodnich rynkach šukała biełaruskaja dziaržava, — kaža «Našaj Nivie» finansavy analityk kampanii Duff & Phelps Maksim Adaskievič. — Tym bolš, što paśla pačatku palityčnaha kryzisu kaciroŭki jeŭraablihacyj «Jeŭratorha» nie padali nastolki mocna, jak kaciroŭki dziaržaŭnych jeŭraablihacyj».
«Ź inšaha boku, biznes «Jeŭraopta» ŭsio ž całkam zaviazany na Biełarusi i dyskont za znachodžańnie ŭ ryzykoŭnaj krainie budzie značny. Tamu, dumaju, što kali heta budzie zachodniaja placoŭka, acenka kampanii moža znoŭ apynucca niedastatkovaj dla biahučych akcyjanieraŭ.
Mahčyma, «Jeŭratorh» źbirajecca na Maskoŭskuju biržu (ci, što mieniej vierahodna, ale taksama tearetyčna realna, na niejkuju niezachodniuju biržu), dzie takoha značnaha «biełaruskaha dyskontu» nie budzie.
Jašče adzin važny faktar paśpiachovaści mahčymaha vychadu na biržu i acenki kampanii — nakolki «Jeŭratorh» zmoža «pradać» inviestaram rost anłajn-biznesu, bo tradycyjnaja roźnica ŭ Biełarusi ciapier nie raście ci navat padaje, plus «Jeŭratorh» abmiežavany ŭ raźvićci antymanapolnym zakanadaŭstvam, jakoje ŭ Biełarusi ŭ śfiery rytejła davoli žorstkaje ŭ paraŭnańni ź inšymi krainami», — reziumuje Adaskievič.
