Jak pracuje schiema?
U Biełarusbanka akramia dziaržavy i fizasob jość akcyjaniery-jurasoby. Niechta ź ich, imavierna, mieŭ kredyt u Biełarusbanku i ŭ 2019-m pahasiŭ jak minimum častku nie hrašyma, a akcyjami samoha Biełarusbanku. Zhodna z zakanadaŭstvam, Biełarusbank abaviazany hetyja akcyi pradać ciaham hodu. I voś tut pačynajecca samaje cikavaje.
Kali akcyi banka handlujucca na likvidnaj biržy — zrazumieła, što jość aryjencir ich biahučaj cany. Ale ŭ Biełarusi takoha niama.
Navat kali niama aryjencira, na raźvitych rynkach bank moža ci pajści da bujnych prafiesijnych inviestaraŭ i pahladzieć jak jany mohuć aceńvać akcyi, ci naniać śpiecyjalista pa acency.
Ale ŭ vypadku dziaržaŭnaha Biełarusbanka jość sfarmavanaja cana ŭ 18 kapiejek za akcyju. Bank piša, paramietr zadadzieny stratehijaj raźvićcia.
Nabyć akcyi mohuć tolki supracoŭniki i akcyjaniery banka. I voś, kali pratrymać hetyja akcyi ŭ siabie dva hady, to isnuje mahčymaść abmianiać 18-kapiejkavyja akcyi na pryvilejavanyja, cana na jakija siońnia — ad 3 da 4,5 rubloŭ. I heta nie kaniec rostu.
«Ciapier «pryvilejavanych» akcyj na rynku ŭ razy mieniej, čym zvyčajnych, ale taksama — amal čatyry miljony akcyj. Pa akcyjach za 18 kapiejek dyvidendy amal nie płaciacca — prybytkovaść pa ich atrymlivajecca 1-2% u hod, — tłumačyć «Našaj Nivie» finansist Maksim Adaśkievič. — A pa pryvilejavanych akcyjach dyvidendy vielmi vialikija, u 2020 byli 51 kapiejka na akcyju. To-bok praz dva hady možna atrymać dachodnaść u sotni pracentaŭ».
Taki prybytak źjaŭlajecca całkam lehalnym i moža być adlustravany ŭ dekłaracyjach.
«Atrymlivajecca, dyvidendy pa pryvilejavanych akcyjach vypłačvajucca ŭ vyniku niedaatrymańnia dyvidendaŭ pa zvyčajnych. Pry hetym, zvyčajnyja akcyi naležać dziaržavie. […] Samaje cikavaje adbyvajecca na trecim etapie prodažu akcyj, kali zdymajecca limit na kolkaść akcyj u adnyja ruki — minułym razam uvieś nierealizavany abjom zabrali za niekalki siekund», — źviartaje ŭvahu ŭ svaim telehram kanale finansist Dźmitryj Naryvončyk.
