Tak zvanyja školnyja bazary razhortvajucca jak na zvyčajnych rynkach, tak i va ŭniviermahach. Apošnija ŭ asartymiencie da navučalnaha siezona dastatkova prakačalisia, i ŭ adnym miescy sapraŭdy možna znajści amal usio — ad kancylaryi da formy ci adzieńnia ŭ dziełavym styli.
Navat minimalny nabor kaštuje bolš za 500 rubloŭ
Kolki ž kaštuje standartny nabor dla školnikaŭ u 2021 hodzie? U naš śpis trapili siarednija košty, jakija my vyznačyli paśla manitorynhu roznych kram.
- Hatovy kancylarski nabor pieršakłaśnika z farbami, sšytkami, vokładkami i inšymi nieabchodnymi pazicyjami — 43,20 rub. (pry hetym kali nabyvać usio paasobku, moža vyjści daražej: naprykład, usiaho adzin pakunak fłamastaraŭ 18 koleraŭ kaštuje šeść rubloŭ).
- Kancylarski nabor dla staršakłaśnikaŭ — 70 rub. (siudy ŭvachodziać u tym liku konturnyja karty).
- Dziońnik — 2,24 rub.
- Zaplečnik — 70 rub.
- Abutak na kožny dzień (paŭbociki) — 80 rub.
- Źmienny abutak — 51 rub.
- Spartovy kaścium — 40 rub.
- Nahavicy i kamizelka dla chłopca — 103,95 rub.
- Pinžak chłapčukovy — 73,43 rub.
- Kašula chłapčukovaja — 53 rub.
- Kašula dziavočaja — 51 rub.
- Spadnica — 22,56 rub. (sukienki — kala 100 rub.).
- Tufli — 98 rub.
- Krasoŭki — 51,28 rub.
Navat z takim minimalnym naboram usiaho nieabchodnaha ŭžo atrymlivajecca bolš za 500 rubloŭ. Ale nie varta zabyvacca, što školnikam jašče patrebny dadatkovy kamplekt adzieńnia na źmienu, a taksama bazavyja cišotki, škarpetki, kałhotki.
«Žyviom u baćkoŭ, kab zrabić pieraraźlik kamunałki»
U fiłołaha z adukacyi Julii Kaziura — troje dziaciej. Starejšy syn idzie ŭ druhi kłas, dačka stanie pieršakłaśnicaj. Małodšamu niama i hodzika. Jula pryznajecca, što kali letaś ich raschody na škołu i sadok układvalisia ŭ 900 rubloŭ, to ciapier składuć minimum 1,5 tysiačy.
«Syn užo pavyrastaŭ sa starych kašul i štanoŭ. A dačce całkam treba padbirać novy harderob u dziełavym styli: u škołu nie pachodziš u sadoŭskich džynsach. Viadoma, adzieńnie budzie ŭ niekalkich kamplektach, kab była forma na źmienu. Kašuli synu my mianiali kožny dzień, naprykład. Štany taksama chutka peckajucca, tamu što dzieci lubiać siadzieć na kalenkach. Karaciej, u nas 1200 rubloŭ adkładziena na adzieńnie (u tym liku na pižamy, kab naviedvać pradoŭžanku) i niedzie 300 na kancylarskija tavary», — dzielicca Julija.
Žnivieńskija raschody siamja płanavała zahadzia, kab jany nie stali niečakanaściu dla siamiejnaha biudžetu. Julija atrymlivaje dekretnyja pamieram 670 rubloŭ, ale, kaniečnie, imi nie pakryješ usie vydatki. Jak šmatdzietnaja siamja Kaziury pretendujuć na materyjalnuju dapamohu na navučalny hod, na kožnaje dzicio sa šmatdzietnaj siamji vydatkoŭvajecca da 30% biudžetu pražytkovaha minimumu. Z 1-ha žniŭnia siaredni pražytkovy minimum u Biełarusi składaje 283 rubli 46 kapiejek. Taksama nievialikuju materyjalnuju dapamohu abiacali na pracy mužu Julii, jon inžynier na dziaržaŭnym pradpryjemstvie. Pry hetym usia hetaja dapamoha, možna skazać, sydzie na dadatkovyja školnyja zbory.
«Letaś my adrazu ž davali kala 40 rubloŭ na ŭsialakija survetki, papieru, vadu. Paśla heta paŭtarałasia ciaham hoda. Kankretnaja suma vyznačajecca ŭ vieraśni z baćkoŭskim kamitetam, tamu pakul nie viedaju, kolki składuć zbory ŭ hetym hodzie», — dadaje surazmoŭca.
Pa źviestkach Nacyjanalnaha statystyčnaha kamiteta, naminalny naličany siaredni zarobak u červieni skłaŭ krychu bolš za 1430 rubloŭ. Ale ŭ krainie niamała ludziej, jakija atrymlivajuć 400 rubloŭ i navat mienš. Na hety vypadak dla baćkoŭ dziejničajuć prahramy rasterminoŭki pa śpieckartkach. U siamji Juli pa takoj schiemie nabyvajuć tolki bujnuju techniku.
«My choć i płanavali ŭsie vydatki, ale addać 1,5 tysiačy tolki na dziciačy šopinh — heta ŭsio adno vielmi šmat. Haładać nie budziem, ale taki imhnienny minus z kartak vielmi adčuvajecca. Kab dadatkova niedzie sekanomić, my ŭsio leta praviali ŭ pryvatnym domie ŭ baćkoŭ. I paśla zrobim pieraraźlik kamunalnych pasłuh».
Ministerstva handlu adznačyła, što rost cen na školnyja tavary sioleta skłaŭ 5%, što traplaje ŭ miežy daviedzienaha paramietra pa inflacyi.
