Abvinavačanaja i paciarpieły ŭ sudzie
Spravu viała sudździa Alena Niamkova, bok dziaržabvinavačvańnia pradstaŭlaŭ prakuror Dźmitryj Jafimaŭ. Paciarpiełym pa spravie prachodziŭ major milicyi z Drahičynskaha RAUS Jury Čarnyškoŭ.
Abvinavačanaja abaraniała siabie sama, ad pasłuh advakata admoviłasia.
Pavodle abvinavačvańnia, Taćciana Dziamidčyk 14 žniŭnia 2020 hoda pakinuła kamientar u sacyjalnaj sietcy «Adnakłaśniki» pad fota Juryja Čarnyškova. Zhodna z acenkaj ekśpierta, kamientar utrymlivaŭ niehatyŭnuju acenku supracoŭnika milicyi.
Na strohim prysudzie dla Dziamidčyk milicyjanier nie nastojvaŭ, ale zaprasiŭ kampiensacyju naniesienaj maralnaj škody ŭ pamiery 2000 rubloŭ, bo mocna paciarpieŭ jaho imidž.
Akazałasia, što pad fota z vyjavaj Čarnyškova, było pakinuta 97 kamientaroŭ, usich vinavatych jon źbirajecca znajści i pryciahnuć da adkaznaści. Sud nad Taćciana Dziamidčyk — heta ŭžo piaty praces, dzie Jury Čarnyškoŭ prachodzić paciarpiełym.
Abvinavačaja pahadziłasia z vypłataj kampiensacyi, ale adznačyła, što suma dla vypłaty vielmi vialikaja, bo jaje zarobak składaje tolki 250 rubleŭ.
Paśla aznajamleńnia ź piśmovymi materyjałami spravy, prakuror Dźmitryj Jafimaŭ u sprečkach bakoŭ prasiŭ pryznačyć pakarańnie dla Taćciany Dziamidčyk u vyhladzie abmiežavańnia voli biez nakiravańnia ŭ papraŭčuju ŭstanovu terminam na adzin hod i šeść miesiacaŭ, a taksama zadavolić isk na kampiensacyju maralnaj škody z pryncypaŭ razumnaści i spraviadlivaści.
U vyniku sud pastanaviŭ pryznać Taćcianu Dziamidčyk vinavataj u ździaśnieńni złačynstva pa art. 369 Krymilnaha kodeksa i pakaraŭ jaje 1,5 «chatniaj chimii». Akramia taho žančyna pavinna vypłacić kampiensacyju paciarpiełamu ŭ pamiery 1500 rubloŭ.
