Fota the18.com
Bielhijski paŭabaronca Tarhan Azar šmat čaho dabiŭsia ŭ futbolnaj karjery. Jon hulaje ŭ dortmundskaj «Barusii», jakaja źjaŭlajecca adnym z najlepšych niamieckich kłubaŭ, taksama byŭ udzielnikam futbolnaha čempijanatu śvietu — 2018 u Rasii i razam z kamandaj atrymaŭ tam bronzu. Ale amatary futboła ŭsio roŭna bolš viedajuć imia brata Tarhana — Edena, hulca słavutaha madrydskaha «Reała».
Uviečary 27 červienia Tarhan usio ž taki zdoleŭ hučna nahadać pra siabie. U hulni płej-of čempijanatu Jeŭropy suprać Partuhalii, na 42-j chvilinie, jon zabiŭ pryhožy hoł — pahladzicie sami:
Dziakujučy hetamu Bielhija prajšła ŭ čverćfinał Jeŭra, dzie 2 lipienia sustreniecca ź Italijaj, a ich supiernik Partuhalija na čale z samim Kryšcijanu Ranałdu, adnym z najlepšych hulcoŭ sučasnaści, adpraviłasia dachaty. Jašče bolš cikava toje, što ŭdar Tarhana Azara vybiŭ ź Jeŭra dziejnych čempijonaŭ Jeŭropy: Partuhalija ŭziała hety tytuł na minułym čempijanacie 2016 hoda.
Zdajecca, i ŭ Tarhana, i ŭ Edena nie było inšaha šlachu ŭ žyćci, akramia futboła, bo ŭ siamji Azaraŭ usio źviazanaje z hetaj hulnioj. Navat matula chłopcaŭ, Karyn, niekali hulała ŭ futboł i była napadajučaj u adnoj z žanočych kamand bielhijskaha pieršaha dyvizijona. Naturalna, što svajho muža, Ćjery, jana taksama sustreła na stadyjonie: jak śviedčyć lehienda, hety paŭprafiesijny hulec pryjšoŭ pahladzieć na dziaŭčat.
Karyn była pieršaj, chto admoviŭsia ad futboła na karyść siamji. Jana syšła sa sportu va ŭzroście 26 hod, na čaćviortym miesiacy ciažarnaści Edenam, svaim starejšym synam. Baćka chłopcaŭ, Ćjery, niejki čas jašče pracavaŭ nastaŭnikam fizičnaj kultury ŭ škole, ale potym pakinuŭ pracu, kab pryśviačać dzieciam bolš času.
Usiaho ŭ siamji Azaraŭ čaćviora dziaciej, usie jany — chłopcy. Ich dziacinstva prachodziła ŭ nievialikim bielhijskim horadzie Bren-lo-Konte. Azary žyli zusim niedaloka ad futbolnaha pola, i braty časta biehali tudy, kab ładzić sabie treniroŭki — a kab trapić na pole, prałazili praź dzirku ŭ aharodžy. Naturalna, što braty hulali ŭ futboł i va ŭłasnym siamiejnym dvoryku, i Tarhan navat raspaviadaŭ žurnalistam, što tyja hulni — jaho najlepšyja dziciačyja ŭspaminy.
Try braty Azary — Tarhan, Kilijan i Etan. Fota lifebogger.com
A jašče chłopcy fanacieli ad zornaha francuzskaha napadajučaha Zinedzina Zidana, jaki jakraz u kancy dzievianostych (kali dakładniej — u 1998 hodzie) razam sa svajo zbornaj staŭ čempijonam śvietu. Cikava, što paźniej starejšy z bratoŭ, Eden, adhulaŭ dva hady ŭ madrydskim «Reale» jakraz pad kiraŭnictvam svajho kumira.
Da «Reała» ŭ žyćci Edena byŭ anhlijski «Čełsi», kudy jon pierachodziŭ u 2012 hodzie razam z bratam Tarhanam. Eden zatrymaŭsia ŭ kłubie na siem hod i za hety čas sabraŭ ź im rossyp uznaharod — varta ŭspomnić chacia b dva tytuły pieramožcy Lihi Jeŭropy i dva čempijonstvy ŭ anhlijskim čempijanacie. Tarhan ža, u svaju čarhu, nie zdoleŭ ni razu vyjści na pole ŭ aficyjnym matčy za «Čełsi» i trapiŭ zamiest hetaha ŭ bielhijski kłub «Ziułte-Varehiem». Narešcie, dva hady tamu jon apynuŭsia ŭ dortmundskaj «Barusii» — na siońnia samym vybitnym kłubie za ŭsiu jaho karjeru.
Eden Azar. Fota elartedf.com
Treci z bratoŭ Azaraŭ, 25-hadovy Kilijan, taksama sprabavaŭ zamacavacca ŭ «Čełsi», ale ŭ vyniku apynuŭsia ŭ bielhijskim kłubie «Serkl Bruhie». Heta staraja kamanda, što niekalki razoŭ vyjhravała čempijanat krainy i nacyjanalny futbolny kubak — praŭda, z časoŭ apošniaha vialikaha trafieja hetaha kłuba prajšło ŭžo 35 hod. Narešcie, najmałodšy z Azaraŭ, 17-hadovy Etan, zaraz hulaje za bielhijski kłub «Ciubiz».
Nasamreč, u hetaj siamji jość i inšyja cikaŭnaści, akramia futboła. Raspaviadajuć, naprykład, što ŭ dziacinstvie braty Azary vielmi lubili razam jeździć na viełasipiedach. Viadoma, što siarod prodkaŭ Azaraŭ jość araby, i časam u siecivie pišuć pra schilnaść bratoŭ da isłamu.
Niekali žurnalisty raźviedali detali staroj sprečki pamiž Edenam i Tarhanam Azaram — maŭlaŭ, chto na kaniec siezona zabivaje mienš hałoŭ u svaim čempijanacie, toj i apłačvaje sumiesnuju viačeru. Cikava, jak na hetyja praviły paŭpłyvaje cudoŭnaja hulnia Tarhana ŭ płej-of Jeŭra?
