Fota Depositphotos.com
Finlandyja słavicca adnoj z najlepšych u śviecie sistem adukacyi. Užo ŭ 15 hadoŭ finskija padletki pakazvajuć na mižnarodnych testach vyšejšyja za siarednija vyniki pa roznych pradmietach. Adnak jak tolki finy zakančvajuć škołu, ich adukacyja časta spyniajecca na niavyznačany termin.
U mnohich krainach talenavityja vypuskniki paśla škoły adrazu ž praciahvajuć navučańnie va ŭniviersitecie. Adnak u Finlandyi takuju mahčymaść majuć tolki kala 20% padletkaŭ, piša The Economist.
Adna z pryčyn — strohi adbor u vyšejšyja navučalnyja ŭstanovy. Kab pastupić va ŭniviersitet, abituryjentam nieabchodna zdavać ustupnyja ekzamieny ŭ dadatak da vypusknych testaŭ u škole. Časta vypusknikam nie ŭdajecca paśpiachova spravicca z roznymi ispytami adnačasova i ŭ škole, i va ŭniviersitecie. Tamu bolšaść miescaŭ u vyšejšych navučalnych ustanovach zajmajuć abituryjenty, jakija skončyli škołu niekalki hadoŭ tamu i mieli čas na padrychtoŭku da ŭniviersiteta.
Da taho ž unutranyja ekzamieny pieraškadžajuć finam padavać dakumienty ŭ roznyja miescy. Atrymlivajecca, što zapasnych varyjantaŭ u abituryjentaŭ niama, tamu talenavityja kandydaty, jakija nie zmahli pastupić u samyja prestyžnyja ŭniviersitety, časta zastajucca zusim bieź miesca.
Tamu šmat talenavitaj finskaj moładzi paśla škoły stračvaje niekalki niezapłanavanych hadoŭ. Heta, u svaju čarhu, adlustroŭvajecca na finskaj ekanomicy. Nasielnictva Finlandyi stareje chutčej, čym u inšych krainach Jeŭropy. Tamu finy nie mohuć dazvolić sabie, kab ambicyjnaja moładź stračvała niekalki hadoŭ da pastupleńnia va ŭniviersitet, bo kožnaje piataje pracoŭnaje miesca ŭ Finlandyi zajmaje čałaviek, navyki jakoha nie da kanca adpaviadajuć patrabavańniam pracadaŭcy.
Finski ŭrad sprabuje vyrašyć hetu prablemu. Letaś univiersitetam dazvolili prymać prynamsi pałovu abituryjentaŭ vyklučna na asnovie ich adznak u škole. Mnohim kandydatam usio tak ža davodzicca zdavać ispyty, ale ciapier ich značna mienš. Miarkujecca, što takija reformy dapamohuć źnizić uzrost, ź jakoha bolšaść studentaŭ pačynaje vučycca.
