Što skazaŭ Navalny ŭ sudzie?
«Ja vierujučy čałaviek, heta pradmiet naśmiešak u FBK. Ciapier ja viernik, i mnie heta mocna dapamahaje ŭ dziejnaści: mienš dylem u maim žyćci, jość knižka, u jakoj vyrazna napisana, što treba rabić u kožnaj situacyi. Nie zaŭsiody jaje lohka prytrymlivacca, ale ja imknusia.
Nie vielmi atrymlivajučy asałodu ad tych miescaŭ, dzie ja znachodžusia, nie adčuvaju škadavańnia. Naadvarot — ja adčuvaju zadavalnieńnie, što ŭ niejki składany momant ja nie zdradziŭ zapavietam.
Biezumoŭna, dla sučasnaha čałavieka zapaviet hučyć vielmi napyšliva. Pra takich ludziej kažuć, što jany dziŭnyja, siadziać u kamierach i sprabujuć siabie čymści padbadzioryć, ale jany nikomu nie patrebnyja. I heta najvažniejšaja reč: i ŭłada, i ŭsia naša sistema sprabuje skazać takim ludziam «ty adzinočka».
Voś hetaja reč pra adzinotu vielmi važnaja — heta meta ŭłady. Dobra z hetaj nahody skazała adna z vydatnych fiłosafaŭ Pałumna Łaŭhud z «Hary Potera»: «Važna nie adčuvać siabie adzinokim, na miescy Vałan-de-Morta ja b chacieła, kab ty adčuvaŭ siabie adzinokim».
Kanvoj — dobryja chłopcy, ale im zabaranili sa mnoj havaryć, kab ja adčuvaŭ siabie adzinokim. Ale ja nie adčuvaju siabie adzinokim. Hetaja kanstrukcyja zdajecca dziŭnavataj, ale na samoj spravie heta hałoŭnaja palityčnaja ideja, jakaja jość u Rasii. Vaša čeść, jaki samy papularny łozunh ŭ Rasii? U čym siła? Pravilna! U praŭdzie. I ŭsia kraina na ŭsie łady paŭtaraje, što siła ŭ praŭdzie. Niahledziačy na toje, što naša kraina pabudavana na niespraviadlivaści, što my pastajanna sutykajemsia ź niespraviadlivaściu. Horšaja — heta niespraviadlivaść uzbrojenaja. Dziasiatki miljonaŭ ludziej chočuć praŭdy i rana ci pozna hetaha dabjucca.
Važnaja reč, jakuju chaču skazać vam, usioj uładzie i ludziam: važna nie bajacca hetych ludziej. Mnohija aścierahajucca — budzie revalucyja. Ale padumajcie sami, jak dobra było b žyć biez pastajannaj chłuśni. Mahčymaść nie chłusić — cudoŭnaja situacyja. Jak było b kłasna pracavać sudździoj: nichto tabie nie telefanuje, u ciabie zarpłata vialikaja, ty pavažany słup hramadstva i nichto nie moža dać ukazańnie pa rašeńni. Ty prychodziš da ŭnukaŭ i kažaš: ja niezaležny.
Kłasna było b być prakuroram, jaki i praŭda ŭ sistemie spabornictva viadzie hulniu, abaraniaje ci asudžaje realnych zładziejaŭ. Nie dumaju, što ludzi stanavilisia prakurorami, kab fabrykavać spravy. Ja nie vieru, što ludzi chočuć być palicyjantami, kab na mitynhu raskroić hałavu, kanvajavać čuvaka, choć jon nievinavaty. Ad chłuśni adny minusy, zarpłaty navat bolšaj niama. Luby biznes u krainie kaštuje ŭ dva razy tańniej, tamu što jość niespraviadlivaść i niama sudovaj sistemy.
Nichto nie choča ŭ FSB atručvać apazicyjaniera, usie chočuć być pavažanymi ludźmi, łavić terarystaŭ i špijonaŭ. I heta važna — nie bajacca ludziej, jakija damahajucca praŭdy, a moža navat niejak ich padtrymlivać. Nie spryjać chłuśni, nie rabić śviet horš vakoł siabie. Jość ryzyka ŭ hetym, ale jana nievialikaja. Jak skazaŭ inšy «fiłosaf» sučasnaści Ryk Sančez: «Žyćcio — heta ryzyka, ale kali ty nie ryzykuješ, to ty mlavaja kupka malekuł, jakaja płyvie pa płyni žyćcia».
Apošniaje. Kožny druhi list mnie zakančvajecca frazaj: «Rasija budzie svabodnaj». Kłasny łozunh, ale čahości mnie nie chapaje. Mnie niedastatkova, kab Rasija była svabodnaj, chaču, kab jana była bahataj, kab nacyjanalnyja bahaćci raźmiarkoŭvalisia pa spraviadlivaści. Chaču, kab była narmalnaja achova zdaroŭja, kab mužčyny dažyvali da piensijnaha ŭzrostu. Ciapier u pałovy mužčyn hetaha nie atrymlivajecca zrabić, dy i ŭ žančyn nie lepš. Ja chaču, kab adukacyja było narmalnaj. Kab za adnu i tuju ž pracu ŭ Rasii atrymlivali zarobak jak u narmalnaj jeŭrapiejskaj krainie.
I tamu prapanuju źmianić łozunh: Rasija pavinna być nie tolki svabodnaj, ale i ščaślivaj. Rasija budzie ščaślivaj. U mianie ŭsio».
