Fota Depositphotos.com
Sprava ŭ tym, što inviestary-amatary abjadnalisia na adnym z forumaŭ sajta Reddit i pačali skuplać akcyi pradaŭca videahulniaŭ Gamestop, jakija jany paličyli niedaacenienymi.
Gamestop zajmajecca tym, što pradaje dyski z hulniami i filmami i inšyja tavary ŭ zvyčajnych kramach. Praz kankurencyju z anłajn-handlem prodažy kampanii padali. Tolki za 2019 hod kampanija straciła $795 miljonaŭ.
Ciapier ža akcyi Gamestop pavysilisia bolš, čym na 300% za apošni tydzień — vynik baraćby pamiž pryvatnymi i prafiesijnymi inviestarami. Apieracyja prajšła paśpiachova, kaciroŭki ŭźlacieli, a prafiesijanały z Uoł-Stryt panieśli vializnyja straty.
Pieradumovaj revalucyi na fondavym rynku, jakaja pačałasia ŭ ZŠA 27 studzienia, staŭ karancin, u vyniku jakoha va ŭsim śviecie pavialičyŭsia intares da nieprafiesijnaha biržavoha anłajn-handlu. Adnoj z papularnych placovak staŭ forum na sajcie Reddit pad nazvaj WallStreetBets.
Viadučyja chedž-fondy z Uoł-Stryt zvyčajna adkryvali pa akcyjach kampanii vialikija karotkija pazicyi na miljardy dalaraŭ. Mierkavałasia, što akcyi Gamestop praciahnuć padać. Adnak u studzieni 2021 hoda karystalniki foruma WallStreetBets pačali masava skuplać akcyi kampanii, tym samym vyklikajučy rost cen na ich.
U vyniku akcyi, jakija na pačatku studzienia kaštavali $17 za štuku, 27 studzienia kaštavali ŭžo $347.
Sprava ŭ tym, što karystalnikam Reddit udałosia dabicca šort-skviza, kali ŭładalniki karotkich pazicyj vymušanyja masava vykuplać akcyi, kab viarnuć ich brokieru i nie zhubić hrošy praz rost cen na akcyi. Popyt na akcyi, u svaju čarhu, imkliva pavialičvajecca i vyklikaje rost kacirovak. U vyniku na piku kacirovak kapitalizacyja Gamestop stała vyšejšaj, čym, naprykład, u viadučaj amierykanskaj avijakampanii Delta.
Tuju ž schiemu pryvatnyja inviestary pačali realizoŭvać ź inšymi kampanijami, dzie było adkryta šmat karotkich pazicyj: Nokia, BlackBerry, sietka kinateatraŭ AMC Entertainment. U vyniku akcyi AMC padaraželi rekordna za adzin dzień na 301%.
Straty prafiesijnych inviestaraŭ z Uoł-Stryt rasceńvajucca miljardami dalaraŭ. Tolki za 27 studzienia i tolki na akcyjach Gamestop uładalniki karotkich pazicyj zhubili $14,3 miljarda. «Ja i nie dumaŭ, što hety ruch stanie takim kultavym», — kaža pradaviec karotkich pazicyj Endru Leŭ z kampanii Citron Research, jakuju karystalniki Reddit taksama ŭklučyli ŭ śpis fłešmobu.
28 studzienia na situacyju adreahavaŭ siervis Robinhood — prahrama, jakaja dazvalaje inviestaram-amataram handlavać akcyjami biez kamisii. Mienavita ź jaje dapamohaj inviestary z WallStreetBets dziejničali na biržy. Servis zabaraniŭ karystalnikam nabyvać akcyi kampanij GameStop, Nokia, AMC i BlackBerry, a pakinuŭ tolki mahčymaść pradavać ich. Takoje rašeńnie Robinhood patłumačyŭ vysokaj vałacilnaściu akcyj, što ryzykoŭna dla inviestaraŭ. Handal hetymi akcyjami pačali abmiažoŭvać i inšyja padobnyja servisy. U vyniku ceny na akcyi kampanij sa śpisa WallStreetBets pačali chutka padać.