1 červienia vyjdzie debiutny albom pieramožcy piesiennaha konkursu «Jeŭrabačańnie‑2009» Alaksandra Rybaka Fairytales («Kazki»).
Pra heta narviežski śpiavak i muzykant raskazaŭ 29 maja padčas anłajn‑kanfierencyi na telekanale ONT u Minsku.
Najbližejšym časam u Rybaka zapłanavany hastroli pa Narviehii, ale sa svaimi tancorami i hurtam jany z zadavalnieńniem pryjeduć i ŭ Biełaruś, zajaviŭ jon.
U Minsk vykanaŭca pryjechaŭ z maci na adzin dzień pavodle zaprašeńnia ANT u jakaści člena žury paŭfinału konkursu «Novyja hałasy Biełarusi».Heta jaho pieršy vizit na radzimu za amal 18 hadoŭ paśla adjezdu ź siamjoj u Narviehiju. Tamu, paviedamiŭ Rybak, jon taksama pryjechaŭ u Minsk, kab «sa svajakami pahavaryć, paznajomicca ź ludźmi, jakija jaho padtrymlivali i padtrymlivajuć». «Tut usie vielmi‑vielmi miłyja i pryjemnyja», — skazaŭ jon.
Minsk, dzie Rybak naradziŭsia ŭ 1986 hodzie, jon zusim nie pamiataje, ale, pavodle jaho słoŭ, «niadrenna pamiataje» vioski ŭ Minskaj i Viciebskaj abłaściach, dzie žyvuć jaho babuli.
Pa‑biełarusku Rybak viedaje niekalki słoŭ, z baćkami ŭ siamji razmaŭlaje pa‑rasiejsku z narviežskimi słovami. A jaho lubimaja strava — biełaruskija kałduny.
«Muzyka — heta natchnieńnie», — zajaviŭ Rybak. Dla roznaha vidu dziejnaści, pavodle jaho słoŭ, jon vybiraje roznuju muzyku, kab jana dapamahała jamu. Udzieł u «Jeŭrabačańni‑2009», zaznačyŭ śpiavak, staŭ samym advažnym učynkam u jaho žyćci. Jon ličyć, što jaho ŭzrost pakul dazvalaje jamu «dureć na scenie». Rybak nie vyklučaje, što stanie kampazitaram i napiša miuzikł. «U 50 hadoŭ nie žadaju być teenage idol — kumiram dla padletkaŭ», — skazaŭ jon.
Adkazvajučy na pytańnie BiełaPAN, pra što śpiavak spytaŭsia b u biełaruskaha prezidenta, kali b źjaviłasia takaja mahčymaść, Rybak adkazaŭ: «Spytaŭ by, jak jamu tut, u Biełarusi?»
