«Pieršaja KinaVideaKampanija» ŭsio ž atrymała biudžetnuju padtrymku na vytvorčaść filma pra alimpijskaha čempijona Alaksandra Miadźviedzia. Heta adzin z tych prajektaŭ, što fihuravaŭ u letnim skandale, kali Ministerstva kultury pastanaviła prafinansavać šerah niezaležnych karcin, ale ŭ vyniku admianiła svajo rašeńnie.
Tady biudžetnyja hrošy atrymali i ich ža pazbavilisia ekranizacyi knih «Sfahnum» Viktara Marcinoviča, «Radziva «Prudok» Andrusia Horvata i jakraz film dla dziciačaj i junackaj aŭdytoryi «Dziesiać žyćciaŭ Miadźviedzia». Nieadnaznačnaść situacyi taksama ŭ tym, što scenarystam i režysioram karciny pra alimpijskaha čempijona źjaŭlajecca Andrej Kudzinienka — aŭtar, čyjo kino zabaraniałasia ŭ Biełarusi.
Farmalnaj pryčynaj admieny dziaržzakupki stali skarhi kiniematahrafistaŭ, jakija nie atrymali finansavańnia, u MARH, maŭlaŭ, bolšaść łotaŭ atrymała «Pieršaja KinaVideaKampanija».
Naprykancy hoda Ministerstvam byŭ abvieščany novy tendar na stvareńnie filma dla dziciačaj i junackaj aŭdytoryi — jak skazaŭ dyrektar «Pieršaj KinaVideaKampanii» Viktar Łabkovič, u im udzielničała šeść kampanij, u tym liku kinastudyja «Biełaruśfilm». Prajekt Andreja Kudzinienki tym nie mienš pieramoh — pavodle ŭmoŭ finansavańnia, vytvorcy atrymlivajuć ad Ministerstva 90 pracentaŭ biudžetu karciny, ale hetym razam taksama biaruć abaviazak aproč poŭnamietražnaha filma stvaryć sieryjał z čatyroch častak.
Padrychtoŭka da zdymak pačniecca 11 studzienia. «Z-za pandemii łahistyka stała vielmi składanaj, asabliva kali heta tyčycca rasijskich akcioraŭ. Budziem hladzieć na abstanoŭku i, zychodziačy ź jaje, karektavać dziejańni», — kaža Viktar Łabkovič.
Hetym razam rašeńnie ab finansavańni nie zmoža być anulavanaje: kinakampanija ŭžo padpisała ź Ministerstvam damovu i atrymała hrošy. Vykanalnik hałoŭnaj roli pakul nieviadomy i budzie vyznačany praz kastynh. Film «Dziesiać žyćciaŭ Miadźviedzia» miarkujecca być zavieršanym u 2022 hodzie.
