U Biełarusi z 1 studzienia admianili dziaržpošlinu za vydaču dazvołu na dopusk transpartnaha srodku da ŭdziełu ŭ darožnym ruchu — ciapier zamiest jaje budzie transpartny padatak. Dobraja navina — płacić pryjdziecca mienš, a praces budzie adviazany ad techahladu. Heta praduhledžana zakonam «Ab źmienie Padatkovaha kodeksa», jaki byŭ apublikavany na Nacyjanalnym pravavym internet-partale, piša Tut.by.
Transpartny padatak buduć płacić usie ŭłaśniki transpartnych srodkaŭ, zarehistravanych u bazie DAI MUS.
Staŭki padatku ŭ paraŭnańni ź dziaržpošlinaj źniziacca. Pamier transpartnaha padatku budzie zaležać ad vahi i faktyčnaha času vałodańnia mašynaj.
Raniej fizičnaj asobie za vydaču dazvołu na dopusk transpartnaha srodku da ŭdziełu ŭ darožnym ruchu za aŭtamabil masaj da 1,5 tony i starejšych za 10 hadoŭ treba było zapłacić 81 rubiel (z 1 studzienia — 61 rubiel). Pry masie mašyny ad 1,5 da 2 ton staŭka składała 162 rubli (ź siońniašniaha dnia pry masie mašyny ad 1,5 da 1,75 tony 81 rubiel, a pry masie mašyny ad 1,75 da 2 ton — 102 rubli).
Płacić transpartny padatak buduć usie aŭtaŭładalniki niezaležna ad udziełu ŭ darožnym ruchu. Pa sutnaści, heta ŭžo nie zbor na darohi, a novy majomasny padatak, jaki płacicca pa fakcie vałodańnia, niezaležna ad taho, karystaješsia ty hetaj majomaściu ci nie: toj, u kaho try aŭto, budzie płacić za ŭsie try; zapłacić pryjdziecca i ŭłaśnikam «aŭtachłamu»: kali mašyna staić na ŭliku ŭ DAI, na jaje naličać padatak.
Taksama praduhledžany lhoty: staŭki padatku dla piensijanieraŭ źniziać na 50%, dla invalidaŭ III hrupy — na 25%. Akramia taho, orhany miascovaha kiravańnia i samakiravańnia zmohuć poŭnaściu abo častkova vyzvalać ad padatku fizičnych asob, jakija znachodziacca ŭ ciažkaj žyćciovaj situacyi.
Vyzvalajucca ad padatku taksama ŭłaśniki elektramabilaŭ i aŭto, vypuščanych da 1991 hoda.
Płacić transpartny padatak treba budzie raz na hod. Usim ułaśnikam transpartnych srodkaŭ buduć rassyłać paviedamleńni z padatkovaj inśpiekcyi. Jak i ŭ vypadku z padatkam na nieruchomaść, paviedamleńni dašluć da 15 listapada, a raźličycca treba budzie da 15 śniežnia.
Adnak nastupny hod budzie pierachodnym: apłata va ŭsich budzie adnolkavaja — 1 bazavaja vieličynia, a ŭžo ŭ 2022 hodzie treba budzie dapłacić padatak.
Tym, chto źnimie aŭto z uliku da 1 lipienia 2021 hoda, płacić padatak nie treba budzie.
Pry niavypłacie naličać pieniu. Na mašyny złosnych niepłacielščykaŭ mohuć nakładać aryšt.
Pastupleńni abiacajuć zaličvać u darožny fond: kala 50% sabranych srodkaŭ buduć pieradavacca ŭ miascovyja biudžety na biahučy i kapitalny ramont miascovych daroh.
