U kancy kastryčnika stała viadoma pra hamialčanku, jakuju zatrymaŭ AMAP za bieł-čyrvony parason. Dziaŭčynie tady nie było 18, baćki napisali list va UUS i paprasili razabracca ŭ situacyi. Dniami siamja atrymała adkaz i raspaviała padrabiaznaści «Mocnym Navinam».
Hamialčanka Anastasija vučycca ŭ adnym z kaledžaŭ. Kastryčnickim viečaram dziaŭčyna išła dadomu pa praśpiekcie Lenina ź bieł-čyrvonym parasonam. Jaje raptam zaciahnuli ŭ aŭtazak, złamali parason, a supracoŭniki AMAPa pahražali i razmaŭlali maciukami. Pa słovach Anastasii, nieviadomy mužčyna pakłaŭ joj pakiet u kišeniu, zahadaŭ nie čapać i pahražaŭ, što «za heta» jana moža «sieści». Paśla razmovy ŭ RAUS Nastu adpuścili z pratakołam apytańnia, tam było napisana, što jana ni ŭ čym nie ŭdzielničała. Paźniej pryjšoŭ list: administracyjnuju spravu nie raspačynali.
29 kastryčnika mama dziaŭčyny napisała list na imia načalnika UUS Homielskaha abłvykankama. U im raspaviała pra vypadak ź nieviadomym i pakietam, paprasiła pryciahnuć vinavatych da administracyjnaj adkaznaści za «naŭmysnaje źniščeńnie abo paškodžańnie majomaści» — złamany parason, a taksama pravieści hutarku z supracoŭnikami AMAPa, što niedapuščalna łajacca matam, pahražać niepaŭnaletnim i psichałahična cisnuć na ich.
Praź miesiac pryjšoŭ adkaz z UUS. U im paznačana: u chodzie pravierki infarmacyja, što supracoŭniki AMAPa złamali parason i hruba pavodzili siabie ź niepaŭnaletniaj, nie paćvierdziłasia. A «vydača dazvołaŭ na pradmiety, nie abmiežavanyja ŭ abarocie, u tym liku parasony, nie adnosiacca da kampietencyi orhanaŭ unutranych spraŭ».
Choć pretenzij u milicyi da Nasty niama i na kaledž, nakolki joj viadoma, nie prychodzili nijakija papiery, źjaviłasia pavyšanaja ŭvaha ad sacyjalnaha piedahoha.
— Vyklikaje mianie padčas vučoby na niezrazumiełyja hutarki, patrabuje nie brać z saboj telefon. Razmovy pra maju hramadzianskuju pazicyi ŭžo naściarožvajuć. Skazali, pieražyvajuć, što ja tut vučusia — nie za mianie chvalujucca, a za kaledž, viadoma. Prahučała cikavaja fraza: «Nu, ja za taboj saču». Potym sacpied rezka pačała apraŭdvacca, što ŭ dobrym sensie.
Jašče kali ja apublikavała pieršy list u svaim instahramie, mamie telefanavała kuratarka i kazała, što ja vielmi aktyŭnaja ŭ sacyjalnych sietkach, treba być bolš aściarožnaj: studenty — samaja nieabaronienaja častka nasielnictva. [Namiok, što] mohuć adličyć. Na što mama adkazała, što heta nie samaje strašnaje — studentaŭ mohuć karmić i apranać baćki, a navučalnych ustanoŭ u krainie šmat.
