«Vieśnik Naftana»
Na AAT «Naftan» zvalniajuć načalnika adździeła realizacyi naftapraduktaŭ Volhu Brycikavu — adnu z aktyŭnych udzielnic pratesnaha ruchu na pradpryjemstvie, jakaja zapomniłasia mnohim jašče padčas žnivieńskich padziej. Volha raspaviała Tut.by, što siońnia ŭ jaje apošni pracoŭny dzień, a zvalnieńnie źviazanaje z pazbaŭleńniem jaje dostupu da dziaržaŭnaj tajamnicy.
— Tak, sapraŭdy, siońnia mianie aznajomili z zahadam ab maim zvalnieńni ŭ suviazi z pazbaŭleńniem mianie dostupu da dziaržtajamnicy. Heta značyć, spačatku byŭ zahad ab pazbaŭleńni dostupu da dziaržtajamnicy, a potym na padstavie hetaha — zvalnieńnie. Zhodna z Pracoŭnym kodeksam takaja opcyja sapraŭdy isnuje, — kaža Volha Brycikava. — Ja była hatovaja da baraćby z tym, što nam uvieś čas sprabujuć prypisać parušeńnie pracoŭnaj dyscypliny, ale ŭ maim vypadku sprava akazałasia ŭ inšym. Zaraz ja pavinna spačatku ŭvažliva pračytać padstavy dla pazbaŭleńnia mianie dostupu da dziaržtajamnicy i razabracca z hetym. Pakul, ščyra kažučy, šok.
Volha Brycikava pracuje na «Naftanie» 16 hadoŭ. 17 žniŭnia na sustrečy rabotnikaŭ «Naftana» z tahačasnym kiraŭnikom KDK Ivanam Ciercielem jana ahučvała patrabavańni da respublikanskich i miascovych uładaŭ, a taksama kiraŭnictva pradpryjemstva ad imia kalektyvu.
U vieraśni Volha raspaviadała, što ŭpieršyniu za ŭsie hady pracy atrymała dyscyplinarnaje spahnańnie ŭ vyhladzie vymovy i pazbaŭleńnia premii za prahuł 20 žniŭnia, kali jana razam z kaleham padličvała podpisy rabotnikaŭ za strajk. A ŭ kastryčniku niekalkim «naftanaŭcam», u tym liku Volzie, pryjšli paviestki ŭ prakuraturu z-za zdymak videazvarotu ŭ padtrymku biełarusaŭ.
