Učora, 26 lipienia, na placoŭcy kala Centra inkluziŭnaj kultury ŭ Homieli prachodziŭ pikiet kandydata ŭ prezidenty Śviatłany Cichanoŭskaj. Pa niekatorych padlikach, jon sabraŭ kala 14 tysiač čałaviek. Nie abyšłosia i biez pravakacyj.
Padčas vystupu kandydata mužčyna kryčaŭ u miehafon «Adkažy, čamu z padmanu pačynaješ? Čamu ŭtaiła dachody?» Da mužčyny adrazu ž padyšli achoŭniki i praduchilili pravakacyju. «Našaj Nivie» ŭdałosia identyfikavać pravakatara. Im akazaŭsia namieśnik dyrektara pa ideałohii adnaho z homielskich pradpryjemstvaŭ. Letaś na parłamienckich vybarach jon byŭ namieśnikam staršyni vybarčaj kamisii. Paśla mitynhu da jaho sprabavali datelefanavacca žurnalisty, ale im nichto nie adkazaŭ.
Bližej da kanca mitynhu byŭ zaŭvažany jašče adzin pravakatar. Maładaja dziaŭčyna prabrałasia da sceny, dastała z zaplečnika miehafon i stała kryčać «Ludzi, kamu vy vierycie? Tut niama za kaho hałasavać!» Ludziam heta nie spadabałasia, natoŭp byŭ nastrojeny varoža ŭ adnosinach da jaje. Tamu słužba biaśpieki adrazu akružyła dziaŭčynu kołam, zabrała miehafon, paśla čaho pravakatarka reciravałasia. Asobu dziaŭčyny da hetaha času nie identyfikavali.
Ale na videa možna zaŭvažyć błandzinku z chvastom i ŭ mascy. Jana ŭvieś čas znachodziłasia pobač ź dziaŭčynaj, u rukach u jaje byŭ telefon. «Mocnym navinam» udałosia vyśvietlić asobu błandzinki. Joju akazałasia dziejučaja zahadčyca siektara ŭpraŭleńnia ideałahičnaj raboty, kultury i pa spravach moładzi homielskaha harvykankama Alena Barkova. Jašče niadaŭna jana vykonvała abaviazki kiraŭnika adździeła. Chutčej za ŭsio, Barkova pryjšła razam ź dziaŭčynaj, bo na videa bačna, što jana sychodzić uśled za joj, potym jany spyniajucca i pra niešta hutarać.
