Abvinavačany Stanisłaŭ Paŭlinkovič vinu pryznaje, ale adznačaje, što «abraźliva vykazaŭsia nie pra samu sudździu, a pra ŭsiu pravaachoŭnuju systemu», paviedamlaje «Radyjo Svaboda».
Suprać aktyvista z Mahilova Stanisłava Paŭlinkoviča zaviali kryminalnuju spravu za abrazu sudździ. Pra heta aktyvistu 27 lipienia paviedamili na pieršym dopycie ŭ Mižrajonnym adździele Śledčaha kamitetu. Jaho vinavaciać u parušeńni 391 artykuła Kryminalnaha kodeksu. Mahčymaje pakarańnie pa hetym artykule — štraf, papraŭčyja pracy ci abmiežavańnie voli da 3 hadoŭ.
Jak vynikaje z pastanovy, Paŭlinkovič 21 traŭnia padčas razhladu administracyjnaj spravy ŭ sudzie Leninskaha rajonu Mahilova pry śviedkach abraźliva vykazaŭsia pra sudździu Aksanu Ratnikavu, tym samym źniavažyŭ jaje honar i hodnaść. Spravu zaviali 22 lipienia, praviali šerah ekspertyzaŭ. 29 lipienia aktyvista paviazuć na sudova-psychijatryčnuju ekspertyzu.
Paŭlinkovič kaža, što vinu pryznaje, ale adznačaje, što «abraźliva vykazaŭsia nie pra samu sudździu (pierad jakoj hatovy vybačycca), a pra ŭsiu pravaachoŭnuju systemu».
Aktyvist nastojvaje, što nie strymaŭ emocyjaŭ, bo za apošni čas jaho rehularna zatrymlivajuć za ŭdzieł u akcyjach pratestu i karajuć štrafami i administracyjnym aryštam.
21 traŭnia Stanisłava Paŭlinkoviča na sud pryvieźli ź izalatara, dzie jon adbyvaŭ 15-sutkavaje pakarańnie za «karmleńnie hałuboŭ». Padčas zatrymańnia jon nie padparadkavaŭsia patrabavańniam milicyjantaŭ, jakija pryjechali jaho zabirać z pracy, i abraziŭ ich. Heta stała nahodaj dla čarhovaj administracyjnaj spravy. Pačuŭšy vyrak — 15 sutak aryštu i 1215 rubloŭ štrafu — aktyvist nie strymaŭ emocyjaŭ.
U červieni Stanisłaŭ Paŭlinkovič apublikavaŭ na svajoj staroncy ŭ Facebook zvarot z prośbaj dapamahčy jamu spłacić štrafy. Na toj momant ich suma składała 3000 rubloŭ. Za miesiac jamu naźbirali 1200.
U 2017 hodzie suprać jaho zavodzili kryminalnuju spravu za nibyta raspaŭsiud videarolika pornahrafičnaha źmiestu. Jaje spynili praz «adsutnaść dokazaŭ, jakija śviedčać ab datyčnaści Paŭlinkoviča da ździejśnienaha złačynstva».