Fota z fejsbuka
Za evakuacyjaj — u pramym sensie słova — Ramana Trafimava hetymi miesiacami sočyć usia Estonija. Hramadskaść kranuła historyja hetaha čałavieka, jaki byŭ vymušany pravieści try z pałovaj miesiacy ŭ budynku aeraporta stalicy Filipinaŭ na padłozie, nie majučy mahčymaści ni vyjści ŭ horad, ni viarnucca nazad, piša Postimees.ee
Jaho prablemy vyrašyła estonskaje MZS: jamu kupili bilet — jašče ŭčora, 7 lipienia, Raman vylecieŭ z Maniły ŭ Amsterdam, i siońnia ŭ 13.20 samalot pavinien byŭ pryziamlicca ŭ aeraporcie Talina.
«Dla ŭsich, chto chacieŭ mianie sustreć: na žal, ja nie paśpieŭ na pasadku na samalot z Amsterdama da Estonii», - napisaŭ Trafimaŭ na svajoj staroncy ŭ Facebook. Nastupny pramy samalot vylecić z Amsterdama zaŭtra ŭ toj ža čas.
Pres-sakratar Ministerstva zamiežnych spraŭ Estonii Leen Lindam prakamientavała, što Raman Trafimaŭ dabraŭsia da krainy — člena ES, dzie dziejničaje svaboda pieramiaščeńnia.
«Avijapieraloty pamiž Amsterdamam i Talinam adbyvajucca štodnia. Z novaj prośbaj pra dapamohu Raman Trafimaŭ da nas nie źviartaŭsia», - patłumačyła Lindam.
16 sakavika Estonija ŭviała strohija karancinnyja zachady. Ministr zamiežnych spraŭ Urmas Rejnsału ŭsich papiaredžvaŭ pra mahčymyja ryzyki padarožžaŭ za miažu. Ale Trafimavu zachaciełasia palacieć na adpačynak na Filipiny. I jon palacieŭ. Prylacieŭ 20 sakavika ŭ Maniłu, a tut i Filipiny ŭviali karancin, admianiŭšy ŭsie rejsy, a zamiežnikam było zabaroniena vychodzić z aeraporta ŭ horad. Tysiačy turystaŭ apynulisia ŭ sapraŭdnaj pastcy: jany nie mahli palacieć dadomu, ale i nie mahli pakinuć terytoryju aeraporta.
Pa prylocie mihracyjnaja słužba Filipin nie tolki admoviła Trafimavu va ŭjeździe ŭ krainu, ale i zabrała jaho šery pašpart niehramadzianina Estonii, paabiacaŭšy jaho viarnuć pierad adjezdam z Maniły.
Situacyja prosta była adzin da adnaho, jak z hierojem Toma Chenksa ŭ filmie «Terminał».
