Hrupa katalickich viernikaŭ Biełarusi abviaściła pra start kampanii suprać falsifikacyi vybaraŭ prezidenta, jakija adbuducca 9 žniŭnia. Praz kampaniju «Katolik, falsifikacyja vybaraŭ — heta ciažki hrech» inicyjatary spadziajucca pavysić śviadomaść katolikaŭ i danieści infarmacyju pra toje, što falsifikacyja, udzieł u falsifikacyjach ci zamoŭčvańnie faktaŭ falsifikacyj źjaŭlajecca ciažkim hrachom, ź jakoha treba spaviadacca.
— Naša zadača — zaachvocić katolikaŭ, jakija ŭvachodziać u skład vybarčych kamisij, vykonvać zakanadaŭstva Biełarusi i praduchilać lubyja parušeńni, — adznačajuć udzielniki kampanii.
U płanach — publikacyi adkrytaha lista da katolikaŭ, vykazvańni śviataroŭ i viadomych śvieckich viernikaŭ, infarmacyja pra navučańni Katalickaha kaścioła pra abaviazki ŭdziełu viernikaŭ u hramadskim i palityčnym žyćci, zvaroty da katolikaŭ, jakija ŭdzielničajuć u falsifikacyjach.
— Kožny katolik pavinien ličyć hałasy ščyra i sumlenna. Kali isnujuć pieradumovy ci strach, što vynik vybaraŭ u kamisii budzie skažacca, katolik moža ŭziać samaadvod. Albo ŭdzielničać u pracy kamisii i infarmavać adpaviednyja orhany pra parušeńni ananimna ci publična, — tłumačać inicyjatary kampanii.
Jany adznačajuć, što śviadomy ŭdzieł i zhoda ź niesumlennaj pracaj vybarčaj kamisii źjaŭlajucca saŭdziełam i hrachom suprać vośmaj zapaviedzi. Jana zabaraniaje falšyvaje śviedčańnie i chłuśniu. Parušeńnie luboj zapaviedzi — heta hrech, i katolik nie moža ŭ hetym udzielničać.
