Sudy i zahsy pierad skasavańniem šlubu buduć prapanoŭvać mužu i žoncy sustreču ź miedyjataram. Z 1 lipienia ŭstupajuć u siłu źmianieńni ŭ zakanadaŭstvie pa pytańniach miedyjacyi, praduhledžanyja zakonam ad 18 śniežnia 2019 hoda numar 277-Z «Ab źmianieńni zakonaŭ», paviedamiła BIEŁTA pres-sakratar Miniusta Volha Šybko.
Hety dakumient unosić papraŭki i ŭ Kodeks ab šlubie i siamji. Zamacoŭvajecca ahulnaje pałažeńnie ab abaviazku suda i zahsaŭ pry zvarocie muža i žonki z zajavaj ab skasavańni šlubu rastłumačvać im prava na ŭdzieł u infarmacyjnaj sustrečy ź miedyjataram. U zakon ab miedyjacyi ŭvodzicca paniaćcie i asnoŭny źmiest takoj sustrečy, kali rastłumačvajucca mety, pryncypy i praviły miedyjacyi, pravy i abaviazki bakoŭ u pracedury, funkcyi, pravy i abaviazki miedyjatara, paradak i pravavyja vyniki zaklučeńnia miedyjatyŭnaha pahadnieńnia.
Pavodle słoŭ Volhi Šybko, hety padychod užo aprabavany ŭ 2017-2018 hadach padčas piłotnaha prajekta ŭ zahsach Minska i paćvierdziŭ svaju efiektyŭnaść. Źmianieńni daduć mahčymaść stvaryć u hramadstvie najbolš spryjalnyja ŭmovy dla zachavańnia siamji i źbieražeńnia siamiejnych kaštoŭnaściej.
Kodeks ab šlubie i siamji taksama dapoŭnieny pałažeńniami, jakija praduhledžvajuć prymianieńnie miedyjacyi pa sprečkach, što ŭźnikajuć z šlubna-siamiejnych adnosin. U pryvatnaści, pradastaŭlajecca prava bakam vyznačyć u šlubnym dahavory vidy sprečak pamiž mužam i žonkaj (byłymi mužam i žonkaj), jakija mohuć być urehulavany z udziełam miedyjatara.
