Fota Nadziei Bužan
Staršynia partyi BSDH Siarhiej Čeračeń padaŭ u CVK dakumienty na rehistracyju kandydatam u prezidenty. Jon zajaviŭ, što varyjant źniacca z vybaraŭ razhledzieŭ by tolki tady, kali b heta «da čaho-niebudź pryviało», piša Tut.by.
Siarhiej Čeračeń nie zmoh acanić svaje šancy na rehistracyju kandydatam u prezidenty. Pavodle jaho słoŭ, na pačatak kampanii šaniec byŭ zusim mizerny, ale toje, nakolki siońnia ludzi hatovyja vykazvać svaju hramadzianskuju pazicyju, mocna źmianiła situacyju ŭ paraŭnańni z tym, što było try miesiacy tamu. Na dumku Čeračnia, paśla rehistracyi kandydataŭ u prezidenty ŭsie zarehistravanyja alternatyŭnyja kandydaty pavinny sieści za stoł pieramovaŭ.
— Kali my razam — u nas jość šaniec. Kali nie… ciapier uvieś praces ujaŭlaje saboj «Hałodnyja hulni»: Toj, chto vybyvaje, hublaje praktyčna ŭsio, kali nie skazać bolš. I kali nie budzie kansalidacyi demakratyčnych sił, to čakać vyniku na hetaj palityčnaj kampanii nie varta, — zajaviŭ Siarhiej Čeračeń.
Jon skazaŭ, što nie čakaŭ hetakich žorstkich represij u dačynieńni da pretendentaŭ u prezidenty. U svaim štabie jon nie raz abmiarkoŭvaŭ hetuju situacyju ŭ razrezie mahčymych represij suprać svajoj kamandy. Na pytańnie, ci razhladaŭ jon varyjant źniacca z vybaraŭ, Čeračeń adznačyŭ, što abhavorvaŭ heta sa svaimi prychilnikami.
— My ŭsie vydatna razumiejem, my sabrali ŭ kamandu ludziej, jakim jość što hublać. Kožny z našaj kamandy — čałaviek, jaki siabie realizavaŭ, i z ulikam tych represij, jakija pravodziacca ŭ dačynieńni da demakratyčnych kandydataŭ, ja razumieju, što jany mohuć zakranuć i nas. I ja kožnamu z kamandy kazaŭ: chłopcy, kožny dla siabie pavinien vyrašyć, nakolki jon hatovy ruchacca dalej. Kali chtości pojdzie nazad, nijakich pretenzij nie budzie, — skazaŭ Čeračeń.
— Ale heta vaš štab, a vy asabista razhladali varyjant źniacca z vybaraŭ paśla aryštu Viktara Babaryki?
— Ja zanadta doŭha išoŭ da hetaj kampanii, ja zanadta šmat vydatkavaŭ času, sił i peŭnych resursaŭ, kab na siońniašni momant źniacca. Kali b heta było nieabchodna i kali b my razumieli, što heta da čaho-niebudź pryviało b, viadoma, ja b źniaŭsia. Ale pakul kancepcyja — my pavinny jašče pazmahacca, kab nie padvieści tych ludziej, jakija ciapier z nami, — skazaŭ pretendent.
