Vandroŭnicki kłub «Art-vandroŭnia», Vilenski biełaruski muziej imia Ivana Łuckieviča, «Biełaruskaja nacyjanalnaja pamiać» abviaščajuć dziciačy konkurs biełaruskaha čytańnia dy biaśpiečnych vandrovak pa rodnym krai.
Pačalisia letnija vakacyi — čas vandrovak, hulniaŭ i pryhod dla našych dzietak. Ale heta i čas, kali možna atrymać asałodu ad čytańnia cikavych knižak, paznajomicca z novymi dla siabie aŭtarami dy ich tvorami. Prapanujem dzietkam spałučyć hetyja vidy adpačynku.
1. Abiarycie biełaruski vierš, jaki vam spadabaŭsia.
2. Padčas vandrovak ci prahułak pa svaim horadzie, miastečku ci vioscy padbiarycie miesca, jakoje adpaviadaje źmiestu vierša. Pažadana, kab heta byŭ viadomy, paznavalny krajavid: pomnik historyi, architektury ci pryrody.
3. Vyrazna pračytajcie abrany vierš na fonie hetaha krajavidu i z dapamohaj baćkoŭ ci siabroŭ albo navat samastojna zdymicie čytańnie na videa. Na pamiać vučyć nie abaviazkova, možna pračytać prosta z knihi.
4. Zahruzicie hetaje videa ŭ fejsbuk ci instahram z chešteham #źvieršampabiełarusi da 30 červienia ŭklučna. Albo paprasicie heta zrabić vašych baćkoŭ ci starejšych bratoŭ, siostraŭ, siabroŭ.
Kolkaść vieršaŭ, jakija vy možacie prapanavać na konkurs, nieabmiežavanaja. Ale kožny vierš pavinien być zapisany asobnym videa i na fonie inšaha pomnika ci krajavidu.
Vy možacie abrać dla čytańnia i niadoŭhi ŭryvak biełaruskaj prozy ci pračytać svoj ułasny vierš. Albo navat prydumać nievialičkuju kazku!
Uvaha! Padčas vandrovak zachoŭvajcie ŭsie praviły epidemijałahičnaj biaśpieki i sacyjalnaha dystancyjavańnia!
Konkurs pryśviečany pamiaci biełaruskaha hramadska-palityčnaha dziejača, kiraŭnika lehiendarnaha moładzievaha abjadnańnia «Tałaka», historyka dy piedahoha Sieržuka Vituški, aŭtara kazak dla darosłych i dziaciej. I pryzami buduć jahonyja knižki dy aŭdyjadyski «Dziń-dziliń: para hulać u kazki!». Hałoŭny pryz — elektronnuju knihu — pradastavić hramadskaje abjadnańnie «Vilenski biełaruski muziej imia Ivana Łuckieviča», stvaralnikam jakoha byŭ spadar Vituška.
Pieramožcy buduć abvieščanyja 2-ha lipienia, u dzień pamiaci Sieržuka Vituški, u supołkach «Art-vandroŭni» i muzieja Łuckieviča ŭ Vilni. Kab sačyć za padziejami i nie prapuscić vyniki konkursu, vy možacie padpisacca na naviny hetych supołak.
