Na minułych vychodnych u pieradačy «Hałoŭny efir» telekanała «Biełaruś 1» vyjšaŭ siužet pra mužčynu, jaki vyžyŭ paśla 39 dzion na aparacie ŠVŁ.
«Jak samaadčuvańnie, Viktar?» — pytajecca hołas za kadram.
«Dobraje samaadčuvańnie», — z uśmieškaj kivaje mužčyna na balničnym łožku.
Mužčyna — pacyjent reanimacyjnaha adździaleńnia Minskaha navukova-praktyčnaha centra chirurhii, transpłantałohii i hiematałohii. Jon zachvareŭ na «karonu» i pravioŭ bolš za miesiac pad aparatam ŠVŁ. Praz 39 sutak mužčynu ŭsio ž palepšała.
Hołas u Viktara jašče słaby.
«Mianie pieravodziać byccam by ŭ ahulnuju pałatu», — kaža jon u siužecie.
Praŭda, pakul što pacyjent usio jašče ŭ reanimacyi. Jaho zavuć Viktar Rabčenia. Jamu 41 hod.
Viktar rodam z-pad Ivacevič, ale daŭno ŭžo žyvie ŭ Minsku. Skončyŭ BDUIR, pracavaŭ inžynieram na zavodzie SVT, jaki zajmajecca vytvorčaściu i prodažam radyjevymiaralnaha abstalavańnia.
«Viktar — načalnik siektara ŭ kanstruktarskim adździele, śpiecyjalist pa ascyłohrafach. Dobry śpiecyjalist, nam zaraz jaho vielmi nie chapaje», — kažuć kalehi.
Pa infarmacyi svajakoŭ, zaraziŭsia mužčyna padčas pajezdki ŭ Viciebskuju vobłaść. U adnoj ź viosak pad Viciebskam u Viktara žyvie siabar. Mužčyna ŭ kancy sakavika pajechaŭ da jaho «rabić mašynu». A pa viartańni pajšoŭ jak zvyčajna na pracu.
«30-31 sakavika Viktar byŭ na pracy. 1 krasavika adčuŭ siabie kiepska, sprabavaŭ doma lačycca. Ale, zdajecca, 5 krasavika jaho ŭsio ž pakłali ŭ balnicu, — raspavioŭ «Našaj Nivie» Valancin Mikłaševič, dyrektar pradpryjemstva. — 7 krasavika my daviedalisia, što ŭ Viktara karanavirus. Na nastupny ž dzień pryjechali śpiecyjalisty dezynfikavać pamiaškańni, dzie jon pracavaŭ, lifty, kalidory. Taksama vyjavili ŭsie kantakty pieršaha i druhoha ŭzroŭniu, adpravili ich na samaizalacyju. Im rabili testy, ich praviarali daktary i milicyja, ale, na ščaście, nichto z pradpryjemstva bolš nie zachvareŭ».
Kalehi zvanili Viktaru, kali jon tolki trapiŭ u balnicu. Kažuć, što razmaŭlaŭ narmalna, chiba tolki trochi kašlaŭ.
Ale ŭžo 10 krasavika mužčynu pahoršała tak, što jaho pakłali na aparat ŠVŁ.
«Pryčym jon nie ŭvieś čas lažaŭ u NPC, da hetaha jon miesiac prabyŭ pad aparatam u inšaj balnicy. Kali jon užo pačaŭ prychodzić u prytomnaść tam, to jaho nie mahli adklučyć ad aparata… Słaba vielmi dychaŭ, sprabavali — nie mahli. Potym pieravieźli ŭ NPC razam z aparatam», — raspaviali «Našaj Nivie» svajaki. Na ščaście, Viktar usio ž vyžyŭ.
«Naša Niva» źviazałasia ź siamjoj Viktara, ale i jon sam, i jaho žonka admovilisia ad kamientaroŭ.
