Fota Nadziei Bužan z treniroŭki hanarovaj varty.
Zhurtavańnie biełarusaŭ śvietu «Baćkaŭščyna» i Sajuz biełaruskich piśmieńnikaŭ zaklikajuć ułady admianić publičnyja mierapryjemstvy.
«Zhurtavańnie biełarusaŭ śvietu «Baćkaŭščyna» złučaje ŭ svaich šerahach pradstaŭnikoŭ biełaruskaj dyjaspary z bolš čym dvaccaci krain śvietu, ludziej samych roznych prafiesij i pohladaŭ, pajadnanych luboŭju da svajoj Radzimy i kłopatam pra jaje. Sajuz biełaruskich piśmieńnikaŭ pradstaŭlaje mierkavańnie biełaruskaj nacyjanalnaj kulturnaj intelihiencyi, stvaralnikaŭ sučasnaj biełaruskaj kultury. My vykazvajem svaju hłybokuju zaniepakojenaść pracesami, što zaraz adbyvajucca ŭ krainie, — vysokaj chutkaściu raspaŭsiudžańnia zachvorvańnia COVID-19 i adsutnaściu efiektyŭnych zachadaŭ pa supraćstajańni virusu z boku biełaruskich uładaŭ», — havorycca ŭ zajavie.
«Raspaŭsiudžańnie zachvorvańnia ŭ našaj krainie vyjaviła vostry niedachop srodkaŭ i materyjałaŭ, nieabchodnych miedykam dla jakasnaha i biaśpiečnaha vykanańnia svajoj pracy.
Nievyraznaja pazicyja biełaruskich uładaŭ, jakija dapuskajuć sumiaščeńnie surjoznych supraćepidemičnych zachadaŭ z pabłažlivaj i lehkadumnaj rytorykaj adnosna niebiaśpieki chvaroby, zmusiła nas źviarnucca sa zvarotam ab pasilnaj dapamozie da suśvietnaj biełaruskaj hramady, jakaja adhuknułasia, niahledziačy na toje, što taksama ŭ svajoj bolšaści znachodzicca ŭ padobnych składanych varunkach.
Dziasiatki hramadskich inicyjatyvaŭ pa zbory dapamohi špitalam i miedykam dziejničajuć i ŭ samoj Biełarusi. Ale asnoŭnaja rola ŭ baraćbie z hetaj suśvietnaj biadoju pavinna naležać dziaržavie.
Dośvied krainaŭ, u jakich atrymałasia pierałamać dynamiku raspaŭsiudu virusa, a taksama materyjały admysłova składzienych dla Biełarusi paradaŭ Suśvietnaj arhanizacyi achovy zdaroŭja (SAAZ), dazvalajuć nam mierkavać, što adnym z hałoŭnych čyńnikaŭ musić być admiena ŭsich masavych mierapryjemstvaŭ, infarmavańnie hramadzianaŭ ab niebiaśpiecy, jakuju niasie COVID-19, a taksama vykanańnie sanitarnych patrabavańniaŭ i sacyjalnaha dystancyjavańnia.
My viedajem, što šmat arhanizacyj biełaruskaj hramadzianskaj supolnaści i biznes-strukturaŭ, dbajučy pra zdaroŭje svaich supracoŭnikaŭ, pierajšli na dystancyjnuju pracu, nie čakajučy adpaviednych zachadaŭ z boku dziaržavy».
«Samaja hałoŭnaja kaštoŭnaść našaj krainy — heta ludzi. Kłopat pra ich žyćcio i zdaroŭje — naš ahulny pryjarytet», — padkreślivajecca ŭ zajavie.
«A tamu my źviartajemsia da biełaruskich uładaŭ z patrabavańniem admianić praviadzieńnie parada 9 maja ŭ stalicy Biełarusi Minsku. My razumiejem, što 75-hodździe Pieramohi — važnaja dla biełaruskaj dziaržavy padzieja, ale śviatkavańnie jubileju nie pavinna vieści da novych achviaraŭ siarod biełarusaŭ u mirny čas.
Srodki, jakija mohuć być zatračanyja na hetaje śviatkavańnie, varta nakiravać na naroščvańnie resursu miedycynskich ustanoŭ, nabyćcio materyjałaŭ i srodkaŭ dla baraćby z pandemijaj, a taksama na padtrymku pradstaŭnikoŭ uraźlivych da karanavirusa hrup hramadzianaŭ», — zaznačajuć aŭtary zvarotu.
