Abmiežavańni na vychad z domu z-za pahrozy karanavirusa ŭ Aŭstryi z 1 maja buduć źniatyja. Pra heta zajaviŭ kiraŭnik Ministerstva achovy zdaroŭja Aŭstryi Rudolf Anšobier, pieradaje rbc.ru sa spasyłkaj na APA.
Patrabavańnie da zachavańnia sacyjalnaj dystancyi ŭ mietr pamiž ludźmi ŭ publičnaj prastory, pavodle jaho słoŭ, zastaniecca ŭ sile, jak i zabarona na schody bolš za dziesiać čałaviek. Ministr unutranych spraŭ Karł Niechamier udakładniŭ, što zroblena vyklučeńnie dla pachavańniaŭ, u jakich zmohuć pryniać udzieł da 30 čałaviek. Dla demanstracyj i mitynhaŭ budzie stvorana asobnaja pravavaja baza, jakaja ŭrehuluje dazvolenuju kolkaść udzielnikaŭ.
Ahienctva ŭdakładniaje, što restarany adčyniać z 15 maja, hateli — z 29 maja. Čakajecca, što ŭ restaranie za adnym stałom dazvolać siadzieć maksimum čaćviarym darosłym, a taksama ich dzieciam. «Sacyjalnaja dystancyja» nie raspaŭsiudžvajecca na naviedvalnikaŭ kaviarań, ale piersanał abaviažuć nasić maski.
Nadzvyčajnyja miery dla baraćby z pašyreńniem karanavirusa pačali dziejničać u krainie z 16 sakavika. Žycharam dazvolili vychodzić z chaty tolki ŭ nieadkładnych vypadkach, naprykład dla pajezdak na pracu abo kupli praduktaŭ. Z 17 sakavika była prypynienaja praca restaranaŭ, dziciačych i spartyŭnych placovak. Ułady taksama spynili pracu bolšaści kram, akramia praduktovych i aptek.
