Biełaruś, jakaja z pačatku 2020 hoda impartuje naftu praz Kłajpiedski port, razhladaje mahčymaść pastavak praź jaho pa čatyry tankiery nafty ŭ miesiac, śćviardžaje litoŭski hruzavy čyhunačny apieratar LG Cargo (uvachodzić u skład dziaržaŭnaj kampanii Lietuvos gelezinkeliai), paviedamlaje Interfax.by.
Jak zajaviŭ BNS kiraŭnik LG Cargo Ehidyjus Łazaŭskas, dla taho, kab prymać bolš tankieraŭ i pieravozić naftu da biełaruskaj miažy, LG Cargo i apieratar partovych terminałaŭ Klaipedos nafta pavinny ŭnieści źmieny ŭ šerah pracesaŭ.
«My sami byli ŭ Biełarusi i mieli kantakty z BNK («Biełaruskaj naftavaj kampanijaj» — BNS), i jany navat kazali pra mahčymaść zakazvać pa čatyry sudny štomiesiac. Pa hetaj pryčynie jak nam, tak i Klaipedos nafta varta było b rearhanizavać niekatoryja pracesy, ale heta mahčyma», — skazaŭ Łazaŭskas.
Z pačatku hoda biełaruski bok užo impartavaŭ praz Kłajpiedu piać tankieraŭ nafty, adnak u BNK niama damovy ab pastajannych pastaŭkach praź Litvu.
Łazaŭskas adznačaje, što z nahody pahadnieńnia Biełarusi i Rasii pa nafcie źjaŭlajucca supiarečlivyja źviestki, ale, pavodle jaho słoŭ, biełaruski bok razumieje važnaść dyviersifikacyi pastavak.
«Jany taksama intensiŭna zakuplajuć praz ukrainskija party, vykarystoŭvajuć naftapravod. Pakul niezrazumieła, da čaho my pryjdziem», — skazaŭ jon.
