Udzielniki prajmieryz pa abrańni adzinaha kandydata ad apazicyi vyznačylisia z maršrutami pajezdak pa krainie. Pieršym horadam, kudy adpraviacca mahčymyja kandydaty, stanie Haradok u Viciebskaj vobłaści.
Źleva naprava: Mikałaj Kazłoŭ, Juraś Hubarevič, Hanna Kanapackaja, Alaksiej Janukievič, Volha Kavalkova i Pavieł Sieviaryniec
«Napiaredadni my prapracavali dziesiać maršrutaŭ pa krainie, jakija ŭklučajuć u siabie aŭtorki, piatnicy, suboty i niadzieli. Aŭtorak — heta adzinkavy vyjezd, a piatnica-niadziela — z načoŭkami. U ahulnym płanie takim čynam kala 50 haradoŭ», — kaža kiraŭnik štaba pa praviadzieńni prajmieryz, staršynia BSDP Ihar Barysaŭ.
Palityk kaža, što było vyrašana, što najpierš buduć skarystanyja maršruty, dzie jość abłasnyja harady. Takim čynam ź dziesiaci maršrutaŭ było abrana čatyry pryjarytetnyja.
«Na papierkach napisali numary maršrutaŭ, dali kiraŭniku kantrolnaj kamisii Piatru Hołasavu vyciahnuć, takim čynam jon vyznačyŭ, što pieršym horadam budzie Haradok 6 sakavika».
U tuju samuju pajezdku apazicyjaniery naviedajuć Viciebsk, Połack i Navapołack (7 sakavika), Pastavy, Šarkaŭščynu i Miory (8 sakavika). Lepiel udzielniki prajmieryz naviedajuć 10 sakavika.
Paśla Viciebskaj vobłaści nakirujucca ŭ Bresckuju. 13 sakavika achvotnyja stać adzinym kandydatam pryjeduć u Biarozu. Brest i Drahičyn paznačany ŭ płanach na 14 sakavika, a Pinsk i Stolin — 15-ha. U Baranavičach apazicyjaniery buduć 17 sakavika.
Pakul dakładna vyznačylisia z dvuma hetymi maršrutami.
