Alimpijski čempijon 2008 hoda pa ciažkaj atletycy Andrej Aramnaŭ dyskvalifikavany na dva hady ŭmoŭna i pazbaŭleny prezidenckaj stypiendyi.Takoje pakarańnie vyniesiena 20-hadovamu spartsmienu 13 sakavika pa vynikach pašyranaha pasiadžeńnia prezidyuma Biełaruskaha ciažkaatletyčnaha sajuza, paviedamiŭ BiełaPAN namieśnik ministra sportu i turyzmu Dźmitryj Šyčko. Prezidenckaj stypiendyi pazbaŭleny taksama asabisty trenier spartsmiena Michaił Saładar.
Spartsmien dvojčy na praciahu troch miesiacaŭ zatrymlivaŭsia supracoŭnikami DAI ŭ Barysavie za kiravańnie aŭtamabilem u niećviarozym stanie, apošni raz — u kancy lutaha.
«Adbyłasia kankretnaja razmova. Byli zasłuchanyja hałoŭny i asabisty treniery, členy prezidyuma. Pieršapačatkova płanavałasia vynieści vielmi žorstkaje rašeńnie, až da dyskvalifikacyi i adličeńnia z štatu nacyjanalnaj kamandy, — zaznačyŭ D.Šyčko. — Spartsmien hruba parušyŭ umovy kantrakta i pałažeńnie ab prezidenckaj stypiendyi, dyskredytavaŭ alimpijski ruch. Adnak, uličvajučy maładość, raskajańnie Aramnava, jaho žadańnie praciahvać pracavać, sankcyi było vyrašana źmiakčyć. Tym bolš što atlet jašče nie maje ŭstojlivaj žyćciovaj pazicyi, adukacyi, faktyčna jon jašče nie ŭzmužnieŭ».
Pavodle słoŭ namieśnika ministra, kali na praciahu vyprabavalnaha terminu A.Aramnaŭ znoŭ parušyć zakon, jon budzie dyskvalifikavany i vyviedzieny z kamandy.
«Na jaki termin spartsmien pazbaŭleny prezidenckaj stypiendyi — pakaža čas. Heta niemałyja hrošy, atrymlivać prezidenckuju stypiendyju — vialiki honar.
Zasłuhi Aramnava vialikija, ale nie dajuć jamu prava pavodzić siabie takim čynam»,— skazaŭ D.Šyčko. Pavodle jaho słoŭ, zahad ź infarmacyjaj ab tym, što zdaryłasia, budzie daviedzieny da viedama ŭsich fiederacyj.
Jak raniej paviedamlaŭ BiełaPAN, pa materyjałach pravaparušeńnia, dapuščanaha A.Aramnavym, pravodzicca pravierka. «Paśla zakančeńnia pravierki, kali budzie dadziena acenka ŭsim akaličnaściam pravaparušeńnia, vyznačana stupień jaho viny, jon budzie pryciahnuty da adkaznaści ŭ adpaviednaści ź dziejnym zakanadaŭstvam», — paviedamiŭ namieśnik načalnika ŭpraŭleńnia DAI MUS Maksim Padbiarozkin. Jon udakładniŭ, što razmova idzie ab pryciahnieńni da adkaznaści pa častcy 2 artykuła 317‑1 Kryminalnaha kodeksa.
Pavodle słoŭ M.Padbiarozkina, za pravaparušeńnie, dapuščanaje ŭ śniežni, A.Aramnaŭ byŭ pryciahnuty da administracyjnaj adkaznaści «na tych samych padstavach, na jakich pryciahvajecca luby inšy hramadzianin».
