Admaŭlajučy ŭ čarhovy raz u rehistracyi «Našaj Viasny», biełaruskija ŭłady ŭ asobie Miniusta parušajuć pravy pravaabaroncaŭ, a taksama nie vykonvajuć mižnarodnyja abaviazki Biełarusi, zajaŭlajuć jurysty.
11 sakavika na aficyjnym sajcie Ministerstva justycyi Respubliki Biełaruś źjaviłasia infarmacyja «Ab admovie ŭ dziaržaŭnaj rehistracyi Hramadskaha pravaabarončaha abjadnańnia «Naša Viasna».
Miniust tłumačyć, što «pad čas vyvučeńnia pradstaŭlenych dakumientaŭ ustanoŭleny šerah uzajemnych nieadpaviednaściaŭ u častcy padadzienych u dakumientach źviestak. Śpis zasnavalnikaŭ abjadnańnia pa šerahu asobaŭ utrymlivaŭ niapoŭnyja źviestki», cytuje artykuł staronka spring96.org.
Uličvajučy «najaŭnaść u pradstaŭlenych dakumientach niapoŭnaj infarmacyi», Ministerstva justycyi detalova vyvučyła akaličnaści, źviazanyja z praviadzieńniem ustanoŭčaha schodu pa stvareńni abjadnańnia «Naša Viasna».
Vyśvietliłasia, u pryvatnaści, što schod, u jakim prymała ŭdzieł 67 čałaviek, pravodziŭsia ŭ pamiaškańni płoščaj niby 35 kv.m. Z ulikam najaŭnaści ŭ pamiaškańni mebli, arhtechniki i raźmiaščeńnia prezidyuma na kožnaha ŭdzielnika schodu pavinna było b prychodzicca mieniej 0,5 kv.m, padličyŭ Miniust.
«Takim čynam, ustanoŭčy schod pa stvareńni HPA «Naša Viasna» nie pravodziŭsia ŭ składzie, pakazanym u pradstaŭlenych u Ministerstva justycyi dakumientach», - pišuć zajaŭniki.
Miniust taksama «ŭstanaviŭ», što bolš pałovy inicyjataraŭ stvareńnia «Našaj Viasny» «pryciahvalisia da administracyjnaj adkaznaści, mnohija ź ich - nieadnarazova. Asobnyja ź inicyjataraŭ pryciahvalisia taksama i da kryminalnaj adkaznaści».
«A ŭ dačynieńni da adnaho z zasnavalnikaŭ była ŭzbudžanaja kryminalnaja sprava pa artykule 130 Kryminalnaha kodeksu Respubliki Biełaruś (raspalvańnie rasavaj, nacyjanalnaj abo relihijnaj varožaści abo roźni). Akramia taho, z pradstaŭlenych dakumientaŭ vynikaje, što na ŭstanoŭčym schodzie byli zaćvierdžanyja mety dziejnaści arhanizacyi, nie ŭklučanyja ŭ statut, što supiarečyć adnamu z asnoŭnych pryncypaŭ stvareńnia i dziejnaści hramadskich abjadnańniaŭ - pryncypu hałosnaści», - praciahvajuć padpisanty.
Hetymi i inšymi parušeńniami Ministerstva justycyi tłumačyć svajo rašeńnie ab admovie ŭ dziaržaŭnaj rehistracyi «Našaj Viasny».
«Na padstavie vykładzienaha Ministerstvam justycyi 26.02.2009 h. było pryniataje rašeńnie ab admovie ŭ dziaržaŭnaj rehistracyi HPA «Naša Viasna». Ab pryniatym rašeńni inicyjatary stvareńnia abjadnańnia prainfarmavanyja va ŭstanoŭleny zakonam termin i mohuć abskardzić jaho ŭ sudovym paradku», - śćviardžaje Miniust.
«U suviazi z tym, što ŭ asobnych ŚMI źjavilisia insinuacyi adnosna pryčynaŭ admovy ŭ dziaržaŭnaj rehistracyi HPA «Naša Viasna», Ministerstva justycyi ličyć nieabchodnym adznačyć, što ŭ Respublicy Biełaruś prava hramadzian na svabodu abjadnańniaŭ harantavanaje Kanstytucyjaj. Adnak realizacyja dadzienaha prava nie pavinna być źviazanaja z parušeńniami zakanadaŭstva abo złoŭžyvańniami hetym pravam z boku inicyjataraŭ stvareńnia hramadskich abjadnańniaŭ», - zajaŭlajuć aŭtary artykułu.
Paviedamleńnie Miniustu dla ŚMI vymušaje zasnavalnikaŭ Hramadskaha pravaabarončaha abjadnańnia «Naša Viasna», u čarhovy raz zajavić: admova ŭ rehistracyi abjadnańnia źjaŭlajecca absalutna niepravavym, dyskryminacyjnym i palityčna matyvavanym krokam uładaŭ, dakładna skiravanym na zabaronu pravaabarončaj dziejnaści.
Arhumienty, vykładzienyja Miniustam, budujucca na słoŭnych insinuacyjach i domysłach i ni ŭ jakim razie nie znachodziacca ŭ rečyščy jurydyčnaj sprečki, ličać zasnavalniki «Našaj Viasny».
«Śćvierdžańnie Miniusta ab tym, što va ŭstanoŭčym schodzie nie prymali ŭdziełu ŭsie zasnavalniki abjadnańnia, spasyłajučysia na płošču pamiaškańnia, źjaŭlajecca nadumanym i nieprafiesijnym. Chočacca nahadać Ministerstvu justycyi, jakim niaprostym šlacham u Biełarusi možna pravieści ustanoŭčyja schody arhanizacyj. Prapanujem śpiecyjalistam Miniusta samim daviedajecca, ź jakoj ciažkaściu, naprykład, partyja BCHD atrymała pamiaškańnie dla praviadzieńnia svajho ŭstanoŭčaha schodu i kolki razoŭ admaŭlałasia mnohim arhanizacyjam u ich pradstaŭleńni», - pišuć pravaabaroncy.
Nastupnaje śćvierdžańnie ab tym, što bolšaść zasnavalnikaŭ hramadskaha abjadnańnia źjaŭlajucca pravaparušalnikami taksama nie vytrymlivaje nijakaj jurydyčnaj krytyki - bo heta nie źjaŭlajecca padstavaj dla admovy ŭ rehistracyi hramadskaha abjadnańnia.
«U svaju čarhu my hanarymsia, što ŭ lik zasnavalnikaŭ «Našaj Viasny» ŭvajšli viadomyja ŭ svaich rehijonach pravaabaroncy, a toje, što jany šmat razoŭ pieraśledvalisia, pierš za ŭsio ŭ administracyjnym paradku, za svaju pravaabarončuju dziejnaść, jašče raz padkreślivaje značnaść i efiektyŭnaść ich pracy», - zajaŭlajuć zasnavalniki abjadnańnia.
«Chočacca asobna padkreślić, što sprava pa art 130 Kryminalnaha kodeksu RB (raspalvańnie rasavaj, nacyjanalnaj albo relihijnaj varožaści) u dačynieńni da pravaabaroncy ź Viciebsku Leanida Śviecika prypynienaja. Sprava datyčyć listoŭ z pahrozami, što byli dasłanyja ad imia RNIE hramadskim aktyvistam ź Viciebsku, jakim pravaabaronca aktyŭna dapamahaŭ rychtavać zvaroty ŭ adpaviednyja orhany ŭłady. Tak što Miniust, jaki adznačie svaju vialikuju pracu pa praviercy dakumientaŭ, datyčnych rehistracyi «Našaj Viasny» i jejnych zasnavalnikaŭ, pavinien byŭ viedać, u jakim stanie znachodzicca rasśledvańnie spravy Leanida Śviecika», - zaŭvažajuć juysty.
Bolš za toje, u adkazie Miniusta raspaŭsiudžanaja niedakładnaja infarmacyja ab kryminalnaj sudzimaści adnaho z zasnavalnikaŭ abjadnańnia, što daje padstavy dla padačy hramadzianskaha zysku ab pryznańni dadzienaj infarmacyi nieadpaviadalnaj rečaisnaści i abražajučaj honar, hodnaść i dziełavuju reputacyju.
«Akramia vyšejzhadanaha, Ministerstva justycyi biessaromna chłusić ab tym, što jano ŭ vyznačany zakonam termin prainfarmavała zasnavalnikaŭ ab admovie ŭ rehistracyi. Miniust sam parušyŭ zakon i paviedamiŭ nam pra rašeńnie tolki praz 5 dzion paśla zakančeńnia maksimalnaha terminu razhladu», - padkreślivajuć zajaŭniki.
Spasyłajučysia na Kanstytucyju, Miniust śćviardžaje, što raelizacyja prava na svabodu abjadnańniaŭ niesumiaščalna sa złoŭžyvańniami hetym pravam z boku inicyjataraŭ stvareńnia hramadskich abjadnańniaŭ. Adnak u artykule 5 Kanstytucyi Respubliki Biełaruś dakładna padajecca pieralik abjadnańniaŭ i partyj, stvareńnie i dziejnaść jakich zabaronienaja.
«Zabaraniajecca stvareńnie i dziejnaść palityčnych partyj, a taksama inšych hramadskich abjadnańniaŭ, jakija majuć na mecie hvałtoŭnaje źmianieńnie kanstytucyjnaha ładu ci viaduć prapahandu vajny, sacyjalnaj, nacyjanalnaj, relihijnaj i rasavaj varožaści», - cytujuć zasnavalniki «Našaj Viasny» Kanstytucyju RB.
«U Respublicy Biełaruś prava hramadzian na svabodu abjadnańniaŭ harantavanaje Kanstytucyjaj», – biezapielacyjna śćviardžaje Miniust. Ale niachaj tady čynoŭniki patłumačać hramadstvu, čamu ŭ Biełarusi 12 čałaviek asudžanyja pa art. 193.1 KK RB («dziejnaść ad imia niezarehistravanaj arhanizacyi»). My nahadvajem, što hety haniebny artykuł nie adpaviadaje pałažeńniam nie tolki našaj Kanstytucyi, ale i Mižnarodnaha paktu ab hramadzianskich i palityčnych pravach», - krytykujuć Ministerstva justycyi pravaabaroncy.
«My nieadnarazova źviartali ŭvahu Miniusta, što rehistracyju arhanizacyi my rascenvajem jak kampiensacyju našaha parušanaha prava na asacyjacyju, ździejśnienaha likvidacyjaj Pravaabarončaha centru «Viasna», adnosna čaho isnuje adpaviednaje rašeńnie Kamiteta pa pravach čałavieka AAN. My taksama nastojvajem, što admaŭlajučy ŭ čarhovy raz u rehistracyi abjadnańnia, biełaruskija ŭłady ŭ asobie Miniusta parušajuć našyja pravy, a taksama nie vykonvajuć mižnarodnyja abaviazki Respubliki Biełaruś», - padsumoŭvajuć jurysty.
Dziejańni Ministerstva justycyi pa admovie ŭ rehistracyi «Našaj Viasny» ŭ bližejšy čas zasnavalniki arhanizacyi abaviazkova abskardziać u sudovym paradku.
