Bolš za hadzinu supracoŭniki milicyi sprabavali spynić aŭto, jakim kiravaŭ niećviarozy kiroŭca.
Lehkavik «Audzi-80» pryciahnuŭ uvahu supracoŭnikaŭ apieratyŭna-dziažurnaj čaści Małaryckaha RUUS a piataj ranicy 21 lutaha. Kiroŭca aŭto bieź vidavočnaj pryčyny sihnaliŭ, u sałonie lehkavika było paŭniutka pasažyraŭ. Na sihnał słužbovaha aŭto kiroŭca «Audzi» nie zreahavaŭ i pasprabavaŭ źjechać. Milicyjanty dahaniali parušalnika na dźviuch aŭto, ale biezvynikova. Daviałosia vyklikać na padmohu supracoŭnikaŭ DAI.
A pałovie na 7-ju daišniki pierakryli šlach u centry horadu. Adnak kiroŭca i tut praihnaravaŭ patrabavańnie spynicca. Jon pasprabavaŭ abjechać pieraškodu pa chodnikach, ale nie spraviŭsia z kiravańniem i sutyknuŭsia z słužbovaj mašynaj.Dalej jon vyrašyŭ uciakać ad pahoni na svaich dvuch. Ale daloka nie ŭciok.
Jak vyśvietliłasia paźniej, małady čałaviek, za jakim bolš za hadzinu pa ranišniaj Małarycie hanialisia milicyjanty, raniej nie adnojčy pryciahvaŭsia da adkaznaści za kiravańnie aŭto ŭ niećviarozym stanie. U 2006 hodzie za heta jaho pazbavili paśviedčańnia kiroŭcy na 3 hady, što nie pieraškodziła jamu ŭ sakaviku i listapadzie minułaha hodu trapić u DTZ «pad muchaj». U toj lutaŭski viečar maładzion taksama byŭ niećviarozy — miedycynskaja ekśpiertyza vyjaviła, što ŭ jahonaj kryvi ŭtrymańnie ałkaholu skłała 1,5 pramile (pry dapuščalnym utrymańni 0,49). Pa vynikach pravierki DAI pakarała parušalnika štrafam u pamiery 50 bazavych vieličyniaŭ (1 młn 750 tys. rubloŭ), a sud Małaryckaha rajonu aštrafavaŭ jaho na sumu 40 b.v. Usiaho — 3 młn 150 tys. rubloŭ. Akramia taho, uličvajučy byłyja «zasłuhi», chłopcu pahražaje kryminalnaja adkaznaść.
