Miascovy aktyvist, arhanizatar akcyi suprać intehracyi z Rasijaj Mikałaj Salanik 21 studzienia abskardžvaŭ rašeńnie Kastryčnickaha suda Hrodna ŭ abłasnym sudzie. Rajonny sud pryznačyŭ Salaniku 45 bazavych vieličyń štrafu (1215 rubloŭ). Vyšejšaja instancyja pakinuła bieź źmienaŭ raniejšaje rašeńnie. Ale jašče da prysudu Salanik prykavaŭ siabie łancuhom da barjernaj stojki ŭ zali suda i admoviŭsia pakidać pamiaškańnie, piša Hrodna.life.
Mikałaja Salanika sudzili 23 śniežnia za dva pravaparušeńni pa artykule 23.34 KaAP RB: za publičny zaklik da niesankcyjanavanaha masavaha mierapryjemstva i za niepasredny ŭdzieł u niesankcyjanavanym mierapryjemstvie. Akcyja suprać intehracyi Biełarusi i Rasii prajšła 15 śniežnia i sabrała kala 70 čałaviek.
U abłasnym sudzie sudzia Sobaleŭ na pačatku pasiedžańnia abviaściŭ pierapynak da taho času, pakul prykavany łancuhom Mikałaj Salanik nie pakinie zału suda. Sam aktyvist admoviŭsia pakidać pamiaškańnie. Tady supracoŭnik departamienta achovy vynies draŭlany barjer, da jakoha byŭ prykavany aktyvist. Salaniku pryjšłosia iści razam.
Źviartacca ŭ sud vyšejšaj instancyi ŭ Biełarusi Salanik bolš nie źbirajecca. Aktyvist budzie pisać skarhu ŭ Kamitet pa pravach čałavieka. U abłasnym sudzie Salanik abviaściŭ pratest. Supracoŭnikam departamienta achovy pryjšłosia vyklikać MNS, kab vyzvalić aktyvista ad łancuha i chutkuju, kab akazać jamu miedyčnuju dapamohu.
