Biełaruś atrymaje $3 młrd ad Kitaju na asnovie ŭhody «svop». Infarmacyju pra damovu apublikavaŭ u sieradu Nacyjanalny bank. Faktyčna, heta čarhovaje zapazyčvańnie. Ahulnaja suma zapazyčvańniaŭ ad pačatku hodu dasiahnuła astranamičnaj ličby $5,2 młrd.
Uhoda «svop» — heta svojeasablivy typ ździełak abmienu, ad anhielskaha słova «swap», abmien baš na baš. Zhodna z pahadnieńniem ab valutnaj uhodzie «svop», zaklučanym miž Nacbankam Biełarusi i jaho kitajskim adpaviednikam, Narodnym bankam Kitaju, Biełaruś atrymaje 20 miljardaŭ juaniaŭ (kala $3 młrd), a kitajski bok — kala 8 tryljonaŭ biełaruskich rubloŭ.
Biełaruski bok uklučyć juani ŭ skład zołatavalutnych reziervaŭ. Kitajski ž bok budzie vykarystoŭvać rubli dla raźlikaŭ ź Biełaruśsiu.Heta značyć, Biełaruś budzie płacić za kitajskija tavary juaniami, a Piekin budzie płacić rublami za biełaruski tavar. Nahadajem, što asnoŭny artykuł biełaruskaha ekspartu ŭ Kitaj — kalijnyja ŭhnajeńni.
U 2008 hodzie dola Kitaju ŭ zamiežnym handli Biełarusi skłała 2,8%. Biełaruś ekspartavała ŭ Kitaj tavaraŭ na sumu 623,9 młn dalaraŭ, impartavała - na $1414,8 młn. Admoŭnaje salda skłała $790,9 młn.
Ź infarmacyi Nacbanku ciažka zrazumieć detali pahadnieńnia, naprykład, u jakoj formie Biełaruś kampiensuje kursavuju ryzyku.
Faktyčna, naša kraina biare trochhadovaje (a mo i raściahnuty na daŭžejšy čas — termin pahadnieńnia moža być padoŭžany, adznačajuć u Nacbanku) pazyčańnie.
Takim čynam, ahulnaja suma dziaržaŭnych zapazyčvańniaŭ ad pačatku hodu dasiahnuła astranamičnaj ličby $5,2 młrd. Akramia taho, dasiahnutyja damoŭlenaści pra atrymańnie jašče 0,5 młrd ad Rasii i 1,7 młrd ad MVF. Biełaruś canoju budučych hadoŭ zabiaśpiečyła sabie adnu z najtaŭščejšych antykryzisnych padušak u śviecie.
Kitaj byŭ adnym z hałoŭnym spažyŭcoŭ biełaruskaha kaliju, ekspart jakoha rezka ŭpaŭ u vyniku finansavaha kryzisu. Zaklučeńnie pahadnieńnia dazvolić adnavić ekspart kalijnych uhnajeńniaŭ. Ekanomija deficytnaj valuty na imparcie budzie bolšaja, čym źmianšeńnie nadychodžańniaŭ ad ekspartu. Pakul niama detalaŭ, ciažka acanić, jakuju ŭskosnuju canu zapłacić za toje Biełaruś.
