Siužet papularnaha polskaha filma pra Ježy Kilera paŭtaryŭsia na Mienščynie. Praŭda, historyja była daloka nie kamiedyjnaja.
Letašnim śniežniem u Siomaj upravie Hałoŭnaj upravy pa baraćbie z arhanizavanaj złačynnaściu daznalisia, što što dyrektar adnoj z staličnych kamiercyjnych firmaŭ šukaje kilera dla zabojstva svajho kampańjona. Kolišnija partniory nie parazumielisia ŭ finansavych pytańniach supolnaha biznesu. Dy tak mocna, što adzin nie znajšoŭ ničoha lepšaha jak zamović druhoha. Za zabojstva jon paabiacaŭ zapłacić 15 tysiač dalaraŭ ZŠA.
Pad vyhladam «kilera» svaje pasłuhi prapanavaŭ zakanśpiravany supracoŭnik upravy. Jon atrymaŭ 500 dalaraŭ avansu, źviestki pra svajho abjekta i jahonuju fatahrafiju. Reštu hrošaj zamoŭca mieŭsia addać tolki pa vykanańni zamovy. Apieratyŭnymi supracoŭnikami była praviedzienaja šmatchadovaja kambinacyja, kab pierakanać zamoŭcu ŭ vykanańni jahonych umovaŭ.
I voś 6 sakavika «kiler» pryznačyŭ svajmu klijentu sustreču na stajancy adnoj z kaviarniaŭ na trasie Miensk—Kojdanava dla kančatkovaha raźliku. Tam jon pakazaŭ dokazy fizičnaj likvidacyi abjekta i atrymaŭ raźlik za nibyta ŭčynienaje zabojstva. U hety momant na haračym arhanizatara i paviazali supracoŭniki ŭpravy z dužymi chłopcami z Specyjalnaha atrada chutkaha reahavańnia MUS.
Prakuratura Mienskaha rajona ŭ dačynieńni da zatrymanaha ŭsčała kryminalnuju spravu pa šerahu artykułaŭ Kryminalnaha kodeksu, u tym liku pa artykule «Zabojstva». Zatrymanaha pasadzili ŭ Izalatar časovaha ŭtrymańnia. Viadziecca rasśledavańnie, paviedamlaje guvd.gov.by.
«Kiler», 1997, vybranyja sceny
