Supracoŭniki milicyi Astraŭca (Hrodzienskaja vobłaść) praviali dahlad u domie lidera hramadskaj inicyjatyvy «Astravieckaja atamnaja — heta złačynstva» Mikałaja Ułasieviča. Pra heta jon paviedamiŭ BiełaPAN.
Pavodle słoŭ M.Ułasieviča, supracoŭniki milicyi praviali dahlad pamiaškańniaŭ u jaho pryvatnym domie ranicaj 11 sakavika. «Milicyjaniery kiravalisia orderam, vydadzienym prakuroram Astravieckaha rajona jašče 6 sakavika. Adnak u hety čas ja byŭ u Minsku na forumie niaŭradavych arhanizacyj, tamu 6—7 sakavika jany nie zmahli pravieści ahlad», — skazaŭ M.Ułasievič.
Jak paviedamiŭ aktyvist, nijakaj kanfiskacyi materyjałaŭ u jaho nie pravodziłasia. «Supracoŭniki milicyi z paniatymi prosta ahledzieli moj dom, zrabili fatahrafii kampjutera i arhtechniki i pajšli. Zhodna z orderam, ahlad pamiaškańnia źviazany z vydańniem haziety «Ostrovieckij viestnik». Adnak asobnikaŭ hetaj haziety ŭ mianie niama, i brać u mianie niama čaho», — skazaŭ M.Ułasievič.
Nahadajem, pieršy numar haziety «Ostrovieckij viestnik» vyjšaŭ u lutym hetaha hoda. Jana nie zarehistravana i vyjšła nakładam nie bolš jak 299 asobnikaŭ, što, zhodna z zakanadaŭstvam, mahčyma biez aficyjnaj rehistracyi. U pieršym numary byli źmieščanyja materyjały, aŭtary jakich vystupajuć suprać budaŭnictva biełaruskaj AES u Astravieckim rajonie.
M.Ułasievič paviedamiŭ, što jon abskardziŭ pastanovu na praviadzieńnie dahladu ŭ prakuratury Astravieckaha rajona, a taksama nakiravaŭ skarhu hienieralnamu prakuroru Biełarusi z patrabavańniem admianić hetuju pastanovu.
Jak raniej paviedamlaŭ BiełaPAN, u pačatku listapada 2008 hoda siem žycharoŭ Astravieckaha rajona, dzie płanujecca budaŭnictva AES, sfarmiravali arhkamitet pa stvareńni hramadskaj inicyjatyvy «Astravieckaja atamnaja — heta złačynstva». Členy arhkamiteta ličać, što AES «pa vyznačeńni nie moža być pabudavanaja ŭ samaj siejsmaniebiaśpiečnaj zonie, jakoj źjaŭlajecca Astraviecki rajon Hrodzienskaj vobłaści». Aprača taho, jany «ŭpeŭnienyja, što budaŭnictva AES u postčarnobylskaj Biełarusi — heta nie prosta pamyłka, a złačynnaja zaduma, jakaja niepaźbiežna pryviadzie da jašče adnoj vialikaj i niepapraŭnaj biady, jakaja vyjdzie daloka za miežy nacyjanalnych maštabaŭ».
