Z 3 pa 10 sakavika ŭ Biełarusi budzie pracavać misija Mižnarodnaha valutnaha fondu (MVF) pa vyvučeńni ekanamičnaj situacyi ŭ krainie, paviedamili BiełaPAN u biełaruskim ofisie MVF.
Misija zojmiecca vyvučeńniem apošnich źmien u ekanomicy Biełarusi. Jaje pryjezd projdzie ŭ miežach prahramy stand‑by i źjaŭlajecca svojeasablivym pramiežkavym pierad ahladnaj misijaj, jakaja płanuje naviedać Minsk u kancy krasavika — pačatku maja, zaznačyli ŭ ofisie MVF.
Hrupu ekśpiertaŭ MVF uznačalić Krystafier Džarvis — novy kiraŭnik misii pa Biełarusi. Raniej misiju MVF pa Biełarusi ŭznačalvaŭ pastajanny pradstaŭnik Mižnarodnaha valutnaha fondu ŭ Rasii Nievien Mates.
***
Vykanaŭčy saviet MVF 12 studzienia 2009 hoda ŭchvaliŭ prahramu stand‑by dla Biełarusi ŭ abjomie pryblizna 2,46 młrd. dołaraŭ pad realizacyju raźličanaj na 15 miesiacaŭ (da krasavika 2010 hoda) prahramy ekanamičnych reform. Pieršy tranš kredytu ŭ 788 młn. dołaraŭ ZŠA pad staŭku LIBOR plus 0,75% hadavych pastupiŭ u Biełaruś 14 studzienia, astatnija srodki pavinny pieraličvacca z ulikam pakvartalnych spravazdač biełaruskaha ŭrada.
Biełaruś źviarnułasia pa atrymańnie kredytu da hetaj mižnarodnaj finansavaj arhanizacyi ŭ kastryčniku 2008 hoda «ŭ metach pavieličeńnia dziaržaŭnych zołatavalutnych reziervaŭ i stvareńnia «paduški biaśpieki», nieabchodnaj dla stabilnaj pracy ekanomiki va ŭmovach suśvietnaha finansavaha kryzisu».
U studzieni ŭ zajavie namieśnika dyrektara‑rasparadčyka MVF Takatošy Kato zaznačałasia, što za praviedzienaj devalvacyjaj nacyjanalnaj valuty ŭ Biełarusi pavinny prajści najvažniejšyja strukturnyja reformy, u tym liku libieralizacyja cen i zarpłaty. Zapłanavanyja ŭradam najvažniejšyja miery ŭklučajuć skaračeńnie metavaha kredytavańnia, dasiahnieńnie zbałansavanaści biudžetu i ahladnuju palityku ŭ śfiery zarabotnaj płaty ŭ dziaržaŭnym siektary.
U pryvatnaści, pavodle infarmacyi MVF, miery pa biudžetnaj kansalidacyi niepasredna skiravanyja na źnižeńnie tempaŭ rostu inviestycyj i spažyvańnia. U 2009 hodzie ŭ Biełarusi pavinien zamarudzicca rost zarpłaty ŭ biudžetnaj śfiery i siektary dziaržpradpryjemstvaŭ, buduć abmiežavanyja dziaržaŭnyja inviestycyi. Buduć taksama skaročany asobnyja subsidyi, ale pry hetym umacavana sistema sacyjalnaj abarony z metaj padtrymańnia najbolš uraźlivych słajoŭ nasielnictva.
U 1995 hodzie MVF spyniŭ vydzialeńnie kredytaŭ Biełarusi z‑za nieadpaviednaści ekanamičnaj palityki ŭrada rekamiendacyjam fondu. U pačatku 2004 hoda ŭrad i Nacbank Biełarusi zajavili pra adsutnaść nieabchodnaści ŭ pryciahnieńni kredytnych resursaŭ MVF. Z taho času i da kanca 2008 hoda supracoŭnictva z fondam było skancentravana na atrymańni techničnaj dapamohi i kansultacyj.
