Niahledziačy na raniej dasiahnutyja damoŭlenaści, druhi tranš rasijskaha stabilizacyjnaha kredytu da kanca lutaha ŭ Biełaruś nie pastupiŭ.
Jak paviedamili BiełaPAN u Nacyjanalnym banku, na rachunki Ministerstva finansaŭ u hałoŭnym banku krainy srodki druhoha tranša rasijskaha kredytu pakul nie pastupali.
U samim Minfinie situacyju z druhim tranšam kredytu nie kamientujuć.
Pieršaja častka rasijskaha kredytu ŭ pamiery 1 młrd. dalaraŭ pastupiła na rachunak Minfina Biełarusi 18 listapada 2008 hoda.Dziaržaŭny kredyt pradastaŭleny Biełarusi na 15 hadoŭ pa staŭcy Libor plus 3% hadavych z adterminoŭkaj pahašeńnia asnoŭnaha doŭhu na piać hadoŭ.
Płanavałasia, što druhi tranš kredytu ŭ pamiery 1 młrd. dalaraŭ budzie pieraličany Biełarusi da kanca lutaha 2009 hoda paśla padpisańnia prahramy sumiesnych dziejańniaŭ pa raźvićci ekanamičnaha supracoŭnictva. Pry hetym u kancy studzienia premjer‑ministr Rasii Uładzimir Pucin paabiacaŭ paskoryć vydaču druhoj pałovy srodkaŭ.
27 lutaha premjer‑ministr Biełarusi Siarhiej Sidorski padčas vizitu ŭ Sankt‑Pieciarburh zajaviŭ, što dakumient ab vydzialeńni druhoha tranša rasijskaha kredytu ŭ pamiery 1 młrd. dalaraŭ ZŠA płanujecca padpisać u Maskvie ŭ najbližejšyja dni. Z hetaj metaj biełaruskija ŭradavyja ekśpierty znachodzilisia na minułym tydni ŭ rasijskaj stalicy.
Pry hetym S.Sidorski zaznačyŭ, što Ministerstva finansaŭ Rasii źviarnułasia da biełaruskich partnioraŭ z prośbaj raździalić srodki druhoj častki kredytu jašče na dva tranšy — pa 500 młn. dalaraŭ u lutym i sakaviku.
24 lutaha padčas naviedvańnia Minskaha matornaha zavoda prezident Alaksandr Łukašenka zajaviŭ, što srodki rasijskich i zachodnich kredytaŭ pakul vykarystoŭvajucca na padtrymańnie nacyjanalnaj valuty.
«Dla nas heta, kaniešnie, vielmi vialikaja padtrymka, ale heta, u paraŭnańni z abjomami raboty našaj ekanomiki, — mizer, — zaznačyŭ biełaruski kiraŭnik. — Pakul što nas, kaniešnie, heta ratuje. Ale nichto nam nie dapamoža ŭ poŭnym abjomie, kali nie budzie pracavać ekanomika».
Viadoma taksama, što, akramia stabilizacyjnaha kredytu, biełaruskija ŭłady zapytali ŭ Rasii kredyt ŭ pamiery 100 młrd. rasijskich rubloŭ u abmien na pierachod na raźliki ŭ rublach va ŭzajemnym handli. Rašeńnie pa hetym zapycie pakul nie pryniata.