U čaradzie vyratavańniaŭ ad hipiertrafičnaj kardyjamijapatyi (a ŭ RNPC «Kardyjałohija» pa aŭtarskaj mietodycy praapieravali ŭžo 90 čałaviek) vypadki Andreja Bujko ź Minska i Hieorhija Zierakidze z Tbilisi ŭnikalnyja. U Andreja była jaje asablivaja ŭskładnienaja forma. U Hieorhija — ekstremalnaja. Nastolki vialiki ŭčastak mižžałudačkavaj pieraharodki treba było vysiačy, što heta stała suśvietnym miedycynskim rekordam. Abiedźvie apieracyi paśpiachova praviali kardyjachirurhi RNPC «Kardyjałohija» Uładzimir Andruščuk i Vital Adzincoŭ, paviedamlaje BiełTA.
Andrej Bujko raniej prafiesijna hulaŭ u chakiej. Kala dziesiaci hadoŭ tamu sa sportam pryjšłosia zaviazać z-za prablem z sercam. Pra svoj dyjahnaz małady čałaviek viedaŭ, ale ŭ jaho vypadku hipiertrafičnaja kardyjamijapatyja, chvaroba kavarnaja, i zusim praktyčna nijak siabie nie pakazvała. A ŭ 2018 hodzie z-za jaje ŭ Andreja zdaryŭsia insult. Tak małady čałaviek trapiŭ da Uładzimira Andruščuka, aŭtara mietodyki trochmiernaha madelavańnia, i toj prapanavaŭ apieracyju. Śpiecyjalisty nie ŭtojvali, što jana budzie ŭnikalnaj. «Pry abśledavańni ŭ Andreja vyjavili hipiertrafičnuju kardyjamijapatyju z paražeńniem siarednich adździełaŭ levaha žałudačka. Raźvilisia ŭžo i infarkt, i tramboz. Plus uskładnieńni ŭ vyhladzie pieraniesienaha insultu», — raspavioŭ kardyjachirurh.
«Heta surjoznaja patałohija, jakuju z-za ciažkadastupnaści i biez taho mała apierujuć, a z takimi ŭskładnieńniami — jašče mienš. U amierykanskaj miedycynskaj litaratury, naprykład, apisana 30 padobnych vypadkaŭ, na postsavieckaj prastory nie zafiksavana nivodnaha», — adznačyŭ Uładzimir Andruščuk.
Uładzimir Andruščuk.
Biełaruskija daktary praapieravali pacyjenta praz razrez anieŭryzmy serca, dzie byli vydaleny tromby i zališni ŭčastak mijakarda. «Možna z upeŭnienaściu skazać, što heta pieršaja takaja apieracyja ŭ SND i adzinkavaja — u śviecie», — padkreśliŭ surazmoŭca. Jon dadaŭ, što paśpieŭ padzialicca navinoj z brytanskimi kalehami i tyja nie ŭtojvali svajho zachapleńnia.
U Jeŭropie zusim niašmat centraŭ, dzie ŭ pryncypie pravodziać padobnyja ŭmiašańni. Pryčym čaściakom pacyjentam prapanoŭvajuć ustalavać pratez zamiest mitralnaha kłapana. Adnak dla lačeńnia takoj formy hipiertrafičnaj kardyjamijapatyi heta nie vielmi efiektyŭna. Biełaruskaja technałohija dazvalaje pravodzić apieracyju maksimalna radykalna, zachoŭvajučy pry hetym mitralny kłapan. 3D-madel dla kožnaha pacyjenta stvarajecca indyvidualna. Heta dakładny pratatyp bijałahičnaha serca, jaho drukujuć na padstavie danych kampjutarnaj tamahrafii z kantrasnym uzmacnieńniem. Sapraŭdnaj apieracyi papiaredničaje virtualnaja, hetym zajmajecca doktar-kardyjachirurh Arciom Niavyhłas. Vyniki svaich manipulacyj jon pieranosić u 3D.
