čym realny palityčny prajekt. Piša Andrej Fiodaraŭ.
Vyrvaŭšysia na jeŭrapiejskuju prastoru, biełaruskaje kiraŭnictva pačało aktyŭna naviorstvać upuščanyja za čas vymušanaha prastoju mahčymaści kantaktaŭ na vysokim uzroŭni. Jak i naležyć pa štacie, prykład padaje ministr zamiežnych spraŭ, jaki nahladna demanstruje, što značyć sapraŭdnaja šmatviektarnaść. Ledź paśpieŭšy viarnucca ź Bierlina, Siarhiej Martynaŭ adpraviŭsia ŭ Vilnius, dzie 14—15 lutaha prajšła jaho sustreča z kalehami ź Litvy i Ukrainy. Na hetym tydni Minsk naviedaje premjer‑ministr jašče adnoj krainy Jeŭrasajuza — Łatvii.
Składvajecca ŭražańnie, što aficyjnyja asoby ŭ Minsku śpiašajucca maksimalna vykarystać spryjalnuju situacyju ŭ adnosinach z Zachadam, pakul jana jašče jość.
Ale navat na hetym fonie vielmi prykmietnym ujaŭlajecca taja asablivaja ŭvaha, jakaja nadajecca ŭzajemadziejańniu z krainami Bałtyi i z aficyjnym Kijevam. Zusim niadaŭna Alaksandr Łukašenka sustrakaŭsia ŭ Čarnihavie z ukrainskim prezidentam Viktaram Juščankam, a ciapier voś Siarhiej Martynaŭ cełyja dva dni hutaryŭ u Vilniusie z kiraŭnikami źniešniepalityčnych viedamstvaŭ Litvy i Ukrainy.
Na žal, infarmacyja pra apošniuju sustreču akazałasia, jak zvyčajna, dastatkova skupoj. «Baki razhledzieli pierśpiektyŭnyja kirunki rehijanalnaha supracoŭnictva, abmianialisia mierkavańniami adnosna inicyjatyvy Uschodniaha partniorstva ES», — łapidarna paviedamiŭ sajt biełaruskaha MZS.
U pryvatnaści, ministry zajavili pra nieabchodnaść uzajemadziejańnia troch krain dla zabieśpiačeńnia funkcyjanavańnia pojezda kambinavanych pieravozak «Vikinh», što daść mahčymaść udaskanalić transpartnuju sistemu i pašyryć hieahrafiju hruzapieravozak. Akramia taho, abmiarkoŭvałasia mahčymaść pastavak ukrainskaj elektraenierhii ŭ Litvu pa terytoryi Biełarusi. Vyrašana stvaryć rabočuju hrupu, jakaja da maja padrychtuje pahadnieńnie ab tranzicie.
Naohuł, stroha kažučy, heta nie tyja prablemy, jakija patrabavali razhladu ŭ takim składzie. Tym bolš što sami pa sabie pieraličanyja prajekty nie novyja i pryncypovaja zhoda na ich realizacyju dadzienaja, pryčym na značna bolš vysokim uzroŭni. Zastajucca, chutčej, techničnyja zadačy, vyrašać jakija pavinny adpaviednyja śpiecyjalisty, što, darečy, i nasamreč mieła miesca.
Takaja nieadpaviednaść tem, jakija abmiarkoŭvalisia, ranhu i ampłua hałoŭnych udzielnikaŭ pieramoŭ dazvoliła niekatorym ahladalnikam vykazać mierkavańnie, što ŭsie hetyja dyskusii pravodzilisia dla advodu vačej.Tady jak asnoŭnym pytańniem, na ich dumku, była značna bolšaja maštabnaja zaduma, ledź ci nie ažyćciaŭleńnie ŭ niejkim varyjancie daŭniaj idei Biełaruskaha narodnaha frontu ab stvareńni Bałta‑Čarnamorskaha sajuza.
Jak ujaŭlajecca, aŭtary padobnych hipotez vydajuć žadanaje za sapraŭdnaje. Ni ab jakoj «viertykalnaj intehracyi» (u hieahrafičnym sensie) u hetym vypadku havorka nie idzie. Usie nazvanyja krainy prosta sprabujuć vyrašyć svaje dastatkova łakalnyja prablemy.
Dy i vielmi naiŭna było b čakać, što taja ž Litva ci, skažam, Polšča, jakaja apošnim časam taksama dastatkova enierhična dziejničaje na biełaruskim napramku, raptam vyrašać farmalizavać svaje adnosiny ź Minskam i Kijevam. U Jeŭrasajuzie heta niejak nie pryniata.
Čysta hipatetyčna jašče, praŭda, možna było b mierkavać, što Ukraina i Biełaruś, jakija zastajucca praktyčna adzinymi krainami, praź jakija idzie tranzit rasijskich enierhanośbitaŭ u Jeŭropu, mahli b niejkim čynam abjadnacca ŭ metach vypracoŭki adzinaj palityki dla supraćstajańnia z tym ža «Hazpromam». Adnak praktyka, u tym liku samaha apošniaha času, pakazvaje, što jany ŭ hetym płanie źjaŭlajucca ŭ bolšaj stupieni kankurentami, čym sajuźnikami.
Heta, urešcie, nijak nie pavinna pieraškadžać supracoŭnictvu ŭ inšych śfierach, naprykład, u asłableńni manapolnaj zaležnaści ad rasijskaj nafty praz pradaŭžeńnie trubapravoda Adesa — Brody.
Što ž da pašyreńnia ŭzajemavyhadnaha rehijanalnaha ŭzajemadziejańnia, to jaho, jak, ułasna, i luboje inšaje, pa vidavočnych pryčynach možna tolki vitać. Ale rabić takuju alternatyvu hłabalnym kirunkam dziaržaŭnaj palityki ŭ siońniašniaj situacyi bieśpierśpiektyŭna.
