Viečaram 12 lutaha ŭ Minsku zatrymany lider zarehistravanaj u Čechii arhanizacyi "Małady front" Dźmitryj Daškievič.
Jak paviedamiła BiełaPAN jaho namieśnik Anastasija Pałažanka, heta adbyłosia prykładna ŭ 19.30 kala Nacyjanalnaha banka. Pierad hetym aktyvisty arhanizacyi praviali akcyju pratestu kala śledčaha izalatara na vulicy Vaładarskaha, dzie znachodziacca aryštavanyja vaŭkavyskija pradprymalniki Mikałaj Aŭtuchovič, Juryj Lavonaŭ i Uładzimir Asipienka.
Razam z D.Daškievičam zatrymany aktyvist "MF" Mikałaj Dziemidzienka. Spačatku maładych ludziej dastavili ŭ raźmieščany pobač Haradski adździeł milicyi № 1, a zatym u Leninski RUUS.
Bližejšuju noč jany praviaduć u Centry izalacyi pravaparušalnikaŭ na vulicy Akreścina. 13 lutaha pavinien adbycca sud. D.Daškievič admoviŭsia pryniać praduktovuju pieradaču i, chutčej za ŭsio, abjavić haładoŭku.
Pavodle mierkavańnia A.Pałažanka, kiraŭnika arhanizacyi ŭłady vyrašyli izalavać napiaredadni akcyi 14 lutaha.
Raniej Minharvykankam admoviŭ apazicyjnym maładziožnym aktyvistam u praviadzieńni akcyj u Dzień śviatoha Valancina 14 lutaha, paviedamiła BiełaPAN pres-sakratar "MF" Taćciana Šapućka.
"Minharvykankam admoviŭ u praviadzieńni šeścia i kancerta ŭ centry horada na padstavie taho, što miesca zboru ŭdzielnikaŭ akcyi — płošča Jakuba Kołasa — znachodzicca kala mietro. A heta supiarečyć art. 9 zakona ab masavych mierapryjemstvach. Alternatyŭnaha miesca Minharvykankam nie prapanoŭvaŭ", — skazała T.Šapućka.
Pavodle jaje słoŭ, zajaŭniki akcyi majuć namier padać u sud na Minharvykankam za zatrymku adkazu. Zhodna z zakanadaŭstvam, jon pavinien być dadzieny nie mienš čym praź piać dzion da praviadzieńnia akcyi. "Siońnia adpaviednaja skarha budzie składziena, a zaŭtra, 13 lutaha, padadziena ŭ sud", — zaznačyła pres-sakratar.
