Pavodle źviestak kamiteta ŭ padtrymku represavanych «Salidarnaść», 26 studentaŭ, jakija vučacca za miažoj pa roznych adukacyjnych prahramach, nie mohuć ujechać u Biełaruś z-za prablem z armijaj albo z pryčyny mahčymaha palityčnaha pieraśledu. Takuju ličbu nazvaŭ 30 studzienia na pres-kanfierencyi namieśnik staršyni maładziožnaj arhanizacyi Partyi BNF «Moładź BNF» Anton Kalinoŭski. Na jaho dumku, hetych maładych ludziej taksama možna ličyć palityčnymi represavanymi, bo ŭ Biełarusi parušajucca ich pravy.
Lider maładziožnaj arhanizacyi Abjadnanaj hramadzianskaj partyi «Maładyja demakraty» Michaił Paškievič, asudžany ŭ 2008 hodzie za ŭdzieł u akcyi pratestu pradprymalnikaŭ, paviedamiŭ, što nad niekalkimi fihurantami hetaj spravy navisła pahroza zaviadzieńnia kryminalnych spraŭ. «U pryvatnaści, nam viadoma, što mohuć być zaviedzieny novyja kryminalnyja spravy na Taćcianu Ciškievič, Arcioma Dubskaha, Michaiła Kryvava, Alaksieja Bondara. Usie jany znachodziacca za miažoj i nie ryzykujuć viartacca ŭ Biełaruś, kab nie trapić pad novyja represii», — skazaŭ M.Paškievič.
Jon zaznačyŭ, što ŭžo doŭhi čas za miežami Biełarusi znachodzicca aktyvist apazicyi Mikita Sasim, jakoha sprabavali zabrać u armiju adrazu ž paśla źbićcia supracoŭnikami AMAPa na akcyi apazicyi. «Aprača taho, Sasim mieŭ sudzimaść, a vajenkamat, niahledziačy na hety faktar, pačaŭ praceduru pryzyvu», — zajaviŭ M.Paškievič.
Palityk źviarnuŭ uvahu na toje, što dastaŭleny 30 studzienia ŭ vajennuju čaść transpartnych vojskaŭ u Žodzinie aktyvist mižnarodnaj maładziožnaj arhanizacyi «Małady front» Dźmitryj Fiedaruk taksama maje palityčnuju sudzimaść.
Tym nie mienš, jaho pryzvali — choć inšych ludziej z sudzimaściami nie pryzyvajuć.
«Usio heta śviedčyć ab tym, što naša armija taksama prymianiaje dvajnyja standarty da maładych ludziej, jakija pryzyvajucca dla terminovaj słužby», — ličyć M.Paškievič.
