Uładzisłaŭ Sikorski, fota wikipedia.pl
Jak zaznačajuć polskija śledčyja, źviestki pra toje, što lider Polščy časoŭ Druhoj suśvietnaj vajny hienierał Uładzisłaŭ Sikorski byŭ zabity, nie znajšli paćvierdžańnia.
Hienierał razam z dačkoj Zofjaj zahinuŭ 4 lipienia 1943 h. u avijakatastrofie la bierahoŭ Hibrałtara, kali viartaŭsia ź inśpiektavańnia polskaha korpusa na Siarednim Uschodzie (u jakim ad 1941 h. znachodziŭsia peŭny pracent błarusaŭ, vyviezienych na Poŭnač i ŭ Sibir).
Samalot raźbiŭsia amal adrazu paśla vyletu z aeradromu ŭ Hibrałtary.
Niekatoryja abstaviny śmierci Sikorskaha da hetaha času niajasnyja. Heta i naradziła mnostva čutak, što jon, mahčyma, byŭ zabity savieckimi ci brytanskimi ahientami.
Tak, u avijakatastrofie vyžyŭ tolki piłot samalota, jaki u toj dzień - ščaślivy źbieh abstavinaŭ - nadzieŭ rataŭničuju kamizelku.
Dva miesiacy tamu polskija ŭłady ekshumavali cieła hienierała Sikorskaha, kab pralić śviatło na abstaviny hibieli.
Ekśpierty vyśvietlili, što śmierć polskaha lidera časoŭ Druhoj suśvietnaj, jaki kiravaŭ uradam u vyhnańni, nastupiła ad imhniennaha spynieńnia bolšaści orhanaŭ, što charakterna dla achviaraŭ avijakatastrofaŭ. Adnačasova nie było znojdziena nijakich śviedčańniaŭ taho, što Sikorski byŭ atručany, zastreleny ci zadušany.
Ale ŭ instytucie pa rasśledavańni złačynstvaŭ Druhoj suśvietnaj zajavili, što sprava pra hibiel hienierała jašče nie zakryta.
Ciapier daviadziecca vyśvietlić, ci nie było padstrojena krušeńnie bambardziroŭščyka, na borcie jakoha byŭ Sikorski.Rasśledavańnie, praviedzienaje brytancami pa haračych śladach, pakazała, što samalot raźbiŭsia ź nieviadomych pryčynaŭ — mahčyma z‑za taho, što spracavała sistema kiravańnia.
Ciaham dziesiacihodździaŭ historyki i dramaturhi vysoŭvali hipotezy, što zahad na zabojstva Sikorskaha mahli dać Stalin ci Čerčyl, kab paźbiehnuć raskołu ŭ stanie sajuźnikaŭ.
Paśla taho jak u krasaviku 1943 h. u Katynskim lesie byli znojdzienyja masavyja pachavańni aficeraŭ polskaha vojska, Sikorski abvinavaciŭ u rasstrełach NKVD i faktyčna razarvaŭ adnosiny z SSSR dy zapatrabavaŭ zrabić toje ž samaje ad Čerčyla.
