Saviet Respubliki siońnia na pasiadžeńni ŭchvaliŭ zakonaprajekt «Ab źmianieńni zakonaŭ efiektyŭnaha funkcyjanavańnia vajennaj arhanizacyi dziaržavy». U zakonaprajekcie praduhledžana, što adterminoŭka ad pryzyvu dla praciahu navučańnia ŭ Biełarusi budzie davacca tolki adzin raz, pieradaje BiełTA.
Pradstaŭlajučy zakonaprajekt sienataram, ministr abarony Andrej Raŭkoŭ kanstatavaŭ, što Uzbrojenyja Siły majuć ciažkaści z kamplektavańniem asabovaha składu. Źviazana heta jak z demahrafičnaj situacyjaj, paharšeńniem zdaroŭja junakoŭ, tak i ź isnavańniem vialikaha liku adterminovak ad vojska.
Zakonaprajekt praduhledžvaje, što adterminoŭku ad pryzyvu dla praciahu adukacyi ŭ Biełarusi buduć davać tolki raz. Kali student užo vykarystaŭ adterminoŭku, jamu budzie pradastaŭleny akademičny adpačynak na słužbu va Uzbrojenych Siłach. Usie adterminoŭki, jakija byli pradastaŭlenyja da ŭstupleńnia ŭ siłu zakonaprajekta, buduć dziejničać.
Akramia taho, prajektam praduhledžana, što tych, chto ŭchiliŭsia ad vojska, nie buduć brać na dziaržaŭnuju słužbu i ŭ siłavyja struktury.
