Naŭsieda pryjšoŭ u palityku z pryvatnaha bankaŭskaha siektara. Jon nazyvaje siabie niezaležnym kandydatam, jaho nie padtrymlivała ni adna partyja, a ŭsie 130 tysiač jeŭra achviaravańniaŭ na vybarčuju kampaniju Naŭsieda atrymaŭ ad pryvatnych asob.
Adzinaja suviaź z palitykaj — praca z eks-prezidentam Litvy Vałdasam Adamkusam. Jany paznajomilisia ŭ 2003 hodzie: padčas pieradvybarčaj kampanii Adamkusa Naŭsieda byŭ jaho pazaštatnym daradcam. Abrany prezident Litvy pryznaje ŭpłyŭ papiarednika.
Zajmacca ekspartam demakratyi na postsavieckaj prastory Naŭsieda nie źbirajecca: «Ja dumaju, što sami ludzi Ukrainy i inšych krain pavinny vyrašać hetuju prablemu, naŭrad ci ekspart niejki demakratyi — najlepšaja alternatyva. Ale dzialicca tymi nabytkami, jakija atrymała Litva z ustupleńniem u ES… Heta zachodnija kaštoŭnaści — my pavinny dzialicca, a ludzi sami vyrašać»
Hitanas Naŭsieda, fota wikipedia.org
«Rasija — ahresar»
Rasiju abrany prezident Litvy ličyć ahresaram z-za padziej u Krymie i na ŭschodzie Ukrainy.
«Heta nieprymalna. Maja palityka ŭ dačynieńni da Rasiei naŭrad ci źmienicca, — raspavioŭ jon. — Naŭrad ci mahčyma padtrymlivać ciopłyja adnosiny z krainaj, jakaja, na žal, ciapier źjaŭlajecca ahresaram u adnosinach da Ukrainy».
Žychary Rasiei, dadaŭ jon, nie pavinny ličyć Litvu voraham.
«Chaciełasia b nie vykarystoŭvać takija terminy, jakija… byli b niepryjemnyja dla ludziej Rasii. Kali my vykarystoŭvajem mocnyja terminy, heta jašče i pieradajecca praź ŚMI Rasiei ŭ takim vyhladzie, što składvajecca imidž Litvy jak voraha, — rastłumačyŭ jon. — Dumaju, ludzi pavinny stasavacca, abmieńvacca dośviedam… Chaciełasia b pabolš bačyć u Litvie śpiektaklaŭ vydatnaha ruskaha teatra, kłasičnaj muzyki».
Naŭsieda nie ličyć rasiejskuju movu častkaj palityki, nazyvaje jaje «nabyćciom» i hatovy havaryć z žurnalistami ŭ tym liku pa-rusku — mnohija bałtyjskija palityki nie robiać hetaha pa pryncypovych mierkavańniach.
«Było b vielmi naiŭna źviazvać movu z hieapalitykaj, kali sa mnoj chočuć kamunikavać na ruskaj movie, ja sprabuju heta rabić. Navyki trochi źmienšylisia — nie tak šmat padstaŭ havaryć na ruskaj, — skazaŭ Bi-bi-si abrany prezident Litvy. — Kali niekatoryja ludzi kažuć, moža, lepš razmaŭlać na anhlijskaj movie, ja tady pytajusia: a vy čytajecie Dastajeŭskaha na anhlijskaj? Napeŭna, kali vy možacie havaryć na abiedźviuch movach, vy chacieli b čytać Dastajeŭskaha na ruskaj».
Libieralnaja roŭnaść
Źniešniaja palityka nie była ŭ centry vybarčaj kampanii Naŭsiedy. U Litvie jon u pieršuju čarhu viadomy jak ekanamist: u pačatku 1990-ch vioŭ ekanamičnuju kałonku ŭ litoŭskaj haziecie, pracavaŭ u radzie pa kankurencyi, uvachodziŭ u kiravańnie Banka Litvy, byŭ hałoŭnym ekanamistam banka SEB, aktyŭna kamientavaŭ u ŚMI ekanamičnyja pytańni.
U pačatku 1990-ch Naŭsieda vučyŭsia ŭ Hiermanii — kaža, mienavita tam jon zaraziŭsia idejami volnaha rynku i libieralnaj ekanomiki.
«Tam ja zrazumieŭ, što zachodni ład žyćcia, rynkavaja ekanomika źjaŭlajucca mienavita tym šlacham, jaki nie vyklikaje ni najmienšych sumnieńniaŭ, a tym časam mieli miesca naiŭnyja dumki pra niejkuju siaredzinu abo treci šlach — poŭny absurd. Maje zachodnija pohlady siońnia tolki ŭzmacniajucca», — cytuje Naŭsiedu litoŭski sajt Delfi.
Naŭsieda pryznaje siabie libieralnym ekanamistam u adnosinach da pryvatnaj ułasnaści: dziaržaŭnaja ŭłasnaść pavinna być tolki tam, dzie jość manapolija.
«Što tyčycca rehulavańnia, to ja chutčej kansiervatyŭny, čym libieralny. Ja baču, što sacyjalnaja dyfierencyjacyja ŭ Litvie nie źnikaje z ekanamičnym rostam. Ja padtrymlivaju aktyŭnuju rolu dziaržavy ŭ rehulavańni, padtrymlivaju prahresiŭnyja padatki — heta, napeŭna, adnosić mianie da sacyjał-demakratyčnaj častki», — skazaŭ Naŭsieda Bi-bi-si.
Baraćba z sacyjalnaj niaroŭnaściu i adroźnieńniami va ŭzroŭni žyćcia ŭ rehijonach krainy stali centralnaj častkaj pieradvybarčaj kampanii Naŭsiedy.
Kataliki, hiei i žančyny
U sacyjalnych pytańniach Naŭsieda chutčej kansiervatyŭny — adnapołyja šluby jon nie padtrymlivaje, ličyć, što pakul lepš spynicca na partniorskich adnosinach.
«Ja za pravy čałavieka. Ale ja baču, što naša katalickaja hramadskaść pakul nie hatovaja. Ja nie chacieŭ by, kab hety praces byŭ štučna aktyvizavany, kab hetym ludziam žyłosia jašče horš, čym da pryniaćcia hetaha rašeńnia», — patłumačyŭ abrany prezident Litvy.
A voś rost roli žančyn va ŭładzie jon padtrymlivaje — kaža, hety ŭpłyŭ skandynaŭskich bankaŭ, u jakich jon prapracavaŭ 19 hadoŭ: «Nienarmalna, kali ŭ našym uradzie adny mužčyny».
