Rabotniki turystyčnaha viedamstva Aŭstralii byli litaralna zavalenyja zajaŭkami, atrymanymi paśla abviestki pra pošuk supracoŭnika dla vykanańnia «najlepšaj pracy ŭ śviecie».
Vebsajt, stvorany śpiecyjalna dla pryjomu zajavak, nie vytrymaŭ kolkaści achvotnikaŭ i lasnuŭ, pryniaŭšy za try dni bolš za miljon paviedamleńniaŭ ad patencyjnych rabotnikaŭ.
Praca na trapičnym vostravie Hamiltan, što na paŭnočna-ŭschodnim uźbiarežžy Aŭstralii (štat Kvinślend), nie patrabuje čahości zvyšnaturalnaha – dastatkova žadańnia płavać, zajmacca dajvinham i chadzić pad vietraziem.
Ščaśliŭčyku dajecca jašče i zarobak 150 tys. aŭstralijskich dalaraŭ (103 tys. amierykanskich) za šeść miesiacaŭ.
Taksama prapanujecca biaspłatnaje pražyvańnie na šykoŭnaj vile z basiejnam.
Kolkaść pretendentaŭ na vakansiju nastolki vialikaja, što supracoŭniki departamienta turyzmu ŭradu Aŭstralii byli vymušanyja pavialičyć kolkaść siervieraŭ, što prymali zajaŭki, z adnaho da dziesiaci.
Najlepšaja praca ŭ śviecie
Hałoŭnyja abaviazki dazorcy Hamiltana – adnoj z aŭstralijskich vyspaŭ Uitsandzi – nastupnyja: karmić rybaŭ dy źbirać poštu.
Aproč taho jamu daviadziecca vieści videa-dziońnik, rabić fatazdymki i pakidać zapisy ŭ interniet-błohu dla pryciahnieńnia turystaŭ.
Na abviestku ŭžo atrymana 2 tysiačy videazajavak, u piatnicu ich pačała prahladać kamanda z 10 čałaviek.
Miarkujecca, što da skančeńnia pryjomu zajavak (22 lutaha) pryjdzie jašče niekalki dziesiatkaŭ tysiač videazapisaŭ.
Vyspa Hamiltan – heta błakitnaje nieba ledź nie 365 dzion u hod, vada i čysty piasok.
U traŭni dziesiać pretendentaŭ, jakich adbiare śpiecyjalnaja kamisija, i jašče adzin, jakoha vyznačać hałasavańniem naviedniki sajtu departamienta turyzmu Kvinślendu, adpraviacca na atoku dla ŭdziełu ŭ finale, jaki projdzie ŭ formie sumoŭja.
Pieramožca prystupić da pracy 1 lipienia.