Kandydat u prezidenty Ukrainy Uładzimir Zialenski na praciahu dvuch apošnich hadoŭ minimum 11 razoŭ lataŭ u Ženievu, kali tam žyŭ aliharch Ihar Kałamojski, a paśla jaho pierajezdu ŭ Izrail jašče dva razy źlataŭ u Tel-Aviŭ, paviedamlaje prahrama rasśledavańniaŭ Schiemi.
Pa infarmacyi žurnalistaŭ, padčas kožnaj druhoj pajezdki šoŭmiena supravadžaŭ juryst aliharcha Andrej Bohdan, jaki ŭ vyniku staŭ hałoŭnym jurydyčnym daradcam kampanii Zialenskaha na vybarach prezidenta.
U Ženievu Zialenski lotaŭ u lutym, krasaviku, listapadzie i śniežni 2017 hoda, a zatym u studzieni, u lutym (dva razy), u sakaviku, u krasaviku (dva razy) i ŭ červieni 2018 hoda. U piaci z hetych pajezdak Andrej Bohdan lacieŭ razam ź im.
Paśla pierajezdu Kałamojskaha ŭ Izrail u kancy leta 2018 hoda, Zialenski jašče dva razy źlataŭ u Tel-Aviŭ, taksama ŭ supravadžeńni Andreja Bohdana — u listapadzie i śniežni 2018 hoda.
Pa danych žurnalistaŭ, Zialenski na praciahu hetaha času nie raz lotaŭ na pryvatnych samalotach razam ź biznes-partniorami aliharcha.
Aliharch Ihar Kałamojski spačatku paviedamiŭ Schiemam, što Zialenski sapraŭdy lotaŭ da jaho na dzień naradžeńnia ŭ Ženievu ŭ lutym 2018 hoda. A na ŭdakładnieńnie, ci była heta ich apošniaja sustreča, aliharch dadaŭ: «Pa-mojmu, tak. Vy kali pačynajecie, pytajeciesia, jak śledčy, tak ja pačynaju krucicca. Nu, moža, dzie i pierasieksia, ale čort jaho viedaje. Nu dyk metanakiravanych sustreč niejkich niama. Nu tym bolš, my ž razumieli, što ŭžo pačałasia palityčnaja historyja, tamu ŭsie hetyja suviazi, jakija jaho kampramietujuć, nam nie patrebnyja», — skazaŭ aliharch.
Andrej Bohdan admoviŭsia kamientavać pryčyny vizitaŭ u Ženievu i Tel-Aviŭ u kampanii Zialenskaha, zajaviŭšy, što heta jaho pryvatnaje žyćcio.
Atrymać tłumačeńni Zialenskaha ab pryčynach častych pieralotaŭ u Tel-Aviŭ i Ženievu ź jurystam aliharcha nie ŭdałosia.
