Dvuchpaviarchovyja damy ŭ Minsku. Fota Siarhieja Hudzilina
Biełaruskija biznesmieny źviarnulisia z prapanovaj rekanstrujavać dvuchpaviarchovyja žyłyja damy ŭ šaścipaviarchoviki. Takaja ideja była ahučanaja na pryjomie, jaki pravodziŭ pamočnik prezidenta pa Minsku Vital Pryma, paviedamlajuć «Minsk-Naviny».
Ich kampanija paśpiachova nadbudoŭvaje šostyja pavierchi-mansardy na damy-«brežnieŭki». Biznesmieny adnačasova pravodziać kapitalny ramont damoŭ i pradajuć kvatery ŭ nadbudovach.
Novaja prapanova ad biznesmienaŭ — rekanstrujavać dvuchpaviarchoviki 1950-ch hadoŭ pabudovy, žychary jakich daŭno čakajuć znosu.
Pradstaŭniki kampanii hatovy rekanstrujavać takija damy, nadbudoŭvajučy pavierchi: pa čatyry źvierchu da dvuch isnujučych. Zapeŭnivajuć, što raboty možna pravieści biez adsialeńnia žycharoŭ, a nahruzka na kanstrukcyi doma nie vyraście, pakolki budzie stvorany dadatkovy padmurak i faktyčna pabudavany novy karkasny škilet vakoł isnujučych ścien.
Vital Pryma daručyŭ haradskim uładam naładzić dyjałoh z pradprymalnikami: «Prapanovu liču cikavaj, jana patrabuje bolš detalovaha razhladu».
