Pradstaŭniki Niezaležnaha prafajuza harniakoŭ zajaŭlajuć, što sutyknulisia ź biesprecedentnym ciskam na svaich siabroŭ. Arhanizacyju za dva miesiacy pakinuła bolš za 600 čałaviek!
Niezaležny prafsajuz harniakoŭ, jaki dziejničaje na pradpryjemstvie «Biełaruśkalij», uvachodzić u skład Biełaruskaha niezaležnaha prafsajuza. Prablemy pačalisia jašče letaś, kali ŭ asobnaje pradpryjemstva byŭ vyviedzieny trest «Rammantažbud». Na hetym pradpryjemstvie była patreba zarehistravać jačejku BNP. Ułady dvojčy admaŭlali ŭ rehistracyi, prafsajuźniki pisali listy ŭ Administracyju prezidenta, u mižnarodnyja instytuty, i tolki tady salihorskija haradskija ŭłady dali zhodu na rehistracyju. Ahułam na hetaje zmahańnie było patračana vosiem miesiacaŭ.
Praŭda, vyhladaje, što na hetym ułady nie spynilisia. I tut pačaŭsia praces vyvadu siabroŭ Niezaležnaha prafsajuzu harniakoŭ z šerahaŭ arhanizacyi. Kiraŭnik NPH Siarhiej Čarkasaŭ kaža, što pierš za ŭsio heta tyčycca tych ludziej, jakija ŭvachodzili adnačasova ŭ skład i niezaležnaha, i praŭładnaha prafsajuzaŭ.
«Dla mianie heta moža być i dziŭnym, ale my nie suprać, kab ludzi byli adrazu ŭ dvuch prafsajuzach. Aficyjny ž prafsajuz zajaviŭ, što suprać siabroŭstva adrazu ŭ dvuch arhanizacyjach. Tolki za 31 sakavika ź liku NPH było vyviedziena 200 čałaviek!», — raskazvaje kiraŭnik NPH Siarhiej Čarkasaŭ.
Pa jahonych słovach, cisnuć dastatkova standartna: kantrakty, pieravody, kažuć, što nie pavysiać na pracy. Kiraŭnictva NPH źviartałasia da hiendyrektara «Biełaruśkalija» Ivana Hałavataha, ale jon zachoŭvaje poŭnaje maŭčańnie.
Na hety momant ź liku siabroŭ NPH było vyviedziena 600 čałaviek z 4000, jakija byli siabrami arhanizacyi raniej. Na piarvičcy BNP na «Rammantažbudzie» situacyja padobnaja, tam šerahi arhanizacyi pakinuła 180 čałaviek. Heta amal pałova siabroŭ.
Kiraŭnictva Niezaležnaha prafsajuzu harniakoŭ kaža, što źviartajecca ŭ mižnarodnyja struktury z hetym pytańniem.
Jany nie vyklučajuć, što buduć prasić vizavych abmiežavańniaŭ suprać ludziej, jakija cisnuć na prafsajuz.
Pa słovach Siarhieja Čarkasava, pra situacyju ŭ Salihorsku ź pieršych vusnaŭ čuła ministarka pracy i sacyjalnaj abarony Iryna Kaścievič, ale jana ličyć za lepšaje zachoŭvać maŭčańnie ŭ situacyi.
Taksama rychtujecca zvarot u Hienieralnuju prakuraturu, kab viedamstva acanili dziejnaść kiraŭnictva «Biełaruśkalija».
