Maradona ŭ Breście, Tut.by
Arhiencinski trenier mieksikanskaha «Daradasa» Dyjeha Maradona abviaściŭ, što hatovy pakinuć svaju pasadu i navat pakinuć futboł. Pra heta 58-hadovy śpiecyjalist zajaviŭ u razmovie z žurnalistami paśla matču druhoha dyvizijona čempijanatu Mieksiki suprać «Vienadasa».
Kamanda Maradony zhulała ŭničyju 1: 1, choć joj byli nieabchodnyja try ački, kab harantavać miesca ŭ płej-of. Na dumku arhiencinca, sudździa nie pryznačyŭ pienalci na karyść «Daradasa».
«Na maim hulcy byŭ čysty pienalci. Viedajecie, čamu jaho nie pryznačyli? Bo tady vy, presa, pačniecie pisać, što kamandzie Maradony dajuć bolš, čym astatnim! Ja nie źbirajusia škodzić takim čynam «Daradasu», tamu vyrašyŭ syści. Mnie treba budzie surjoznaja razmova z prezidentam kłuba. Šlachu nazad niama», - zajaviŭ Maradona.
Akramia taho, były futbalist zbornaj Arhientyny padkreśliŭ, što moža syści z futbołu. «Pahavaru z žonkaj. Chopić ź mianie futboła, pastajannych svarak. Drenna siabie viadzieš - ty horšy ŭ śviecie. Viadzieš siabie dobra — znoŭ najhoršy. Heta niespraviadliva, ale ja z hetym ničoha zrabić nie mahu», - skazaŭ na zakančeńnie trenier.
Maradona uznačaliŭ «Daradas» u vieraśni 2018-ha. U mai 2018 hoda stała viadoma, što jon staŭ staršynioj praŭleńnia bresckaha «Dynama», u lipieni futbalist prylacieŭ u Brest na dva dni, ale bolš tam nie źjaŭlaŭsia.
