Vyšejšuju adukacyju jon atrymaŭ u 31 hod, ale dasłužyŭsia da samych vysokich pasadaŭ.
«50 hadoŭ BSSR» i «Kryvaja Hrada»
Leanidu Zajcu sioleta budzie ŭžo 61 hod. Heta daloka nie samy małady čynoŭnik u łukašenkaŭskaj abojmie, ale viadoma pra jaho nie tak i šmat.
Naradziŭsia jon u vioscy Hacuk. Heta samaja poŭnač Słuckaha rajona, da Minska kala 55 kiłamietraŭ. Heta vioska bolš čym na tysiaču žycharoŭ. Jość škoła, muzyčnaja škołka, sadok, niekalki mahazinaŭ.
Miascovyja ludzi ŭ asnoŭnym pracujuć na torfpradpryjemstvie «Słuckaje». Kaliści ŭ vioscy byŭ cech «Miłavicy», ale jaho zakryli. Zajac — heta adno z najbolš raspaŭsiudžanych miascovych proźviščaŭ. Jašče časta ŭžyvajucca Kalada, Chaćko, Kaziučyc.
Siaredniuju škołu Leanid Zajac skončyŭ u 1976 hodzie. Jon nie pajšoŭ vučycca va ŭniviersitet, trapiŭ u vojska. A paśla viarnuŭsia ŭ rodnuju viosku. Pačaŭ pracavać traktarystam u kałhasie «50 hadoŭ BSSR». Ciapier hetaja haspadarka maje nazvu «Kryvaja Hrada».
Praź niejki čas pracy ŭ kałhasie Zajac pastupaje na zavočnaje ŭ Sielskahaspadarčuju akademiju ŭ Horkach, navučajecca tam na ahranoma. Kali advučyŭsia, to staŭ hałoŭnym ahranomam u kałhasie «Słuck», jaki znachodzicca zusim pobač z Hacukom.
Jak vybivaŭsia ŭ ludzi
U cełym bijahrafija Zajca krychu nahadvaje bijahrafiju Alaksandra Łukašenki. Vučoba ŭ Horkach, praca ŭ kałhasie. Praŭda, u palityku Zajac tak i nie pajšoŭ.
Kali Saviecki Sajuz kanaŭ, to Leanidu Zajcu prapanavali ŭznačalić rodny kałhas. Praŭda, zvaŭsia jon na toj momant nie «50 hadoŭ BSSR», a «Biełaruś». Heta adna z samych paśpiachovych haspadarak Słuččyny. Była jana ŭ paradku i ŭ nie samyja prybytkovyja časy — pačatak 1990-ch.
U 1998 hodzie Zajca zabrali ŭ rajcentr. Jon uznačaliŭ zavod chlebapraduktaŭ. Ale heta była tolki prystupka da bolš vysokich pasadaŭ. Užo praz hod jaho zabirajuć staršynioj Maładziečanskaha rajvykankama. Čamu nie ŭ słucki? Sprava ŭ tym, što hety rajon na toj čas uznačalvaŭ jašče adzin budučy top-čynoŭnik — Zianon Łomać.
I choć sam Zajac u Maładziečnie adpracavaŭ nie tak doŭha, ale žyćcio, chaj i praz dačku, źviaža z hetym horadam.
U 2001 hodzie Mikałaj Damaškievič zabiare Leanida Zajca da siabie namieśnikam u Minski abłvykankam. Tam Zajac adkazvaje za sielskuju haspadarku i charčavańnie.
Ale z adstaŭkaj Damaškieviča i prychodam Leanida Krupca pracy ŭ abłvykankamie dla Leanida Zajca nie zastałosia, tamu jon pierachodzić dyrektaram u adzin z najlepšych u krainie ahrakambinataŭ — u «Dziaržynski». Cikava, što Zajac staŭ nie pieršym kiraŭnikom «Dziaržynskaha», jaki paśla skoknuŭ u ministry. Da jaho taki samy los paŭtaryŭ Siamion Šapira.
Jakim byŭ ministram
Uha Čaves i Leanid Zajac.
Ad 2012 hoda Leanid Zajac znachodziŭsia na pasadzie ministra sielskaj haspadarki. U rejtynhach samych upłyvovych ludziej Biełarusi, jakija składała «Naša Niva», čynoŭnik tradycyjna znachodziŭsia ŭ vośmym i dziaviatym dziasiatku.
Čynoŭnik chvaliŭ Łukašenku za toje, što toj u 1994 nie paddaŭsia modzie na fiermierskija haspadarki, a adstojvaŭ kałhasy. Hetkija ŭčynki kiraŭnika dziaržavy jon nazyvaŭ «mudrymi».
Leanid Zajac havoryć z mocnym biełaruskim akcentam, havaryć čysta pa-rusku jon nie ŭmieje.
«Ahraryi pavinny być udziačnyja dziaržavie», — adzin z pastułataŭ pracy Zajca. Za jaho čas u krainie źjaviłasia niekalki paśpiachovych haspadarak, ale ŭ cełym śfiera zastajecca adstajučaj na fonie susiednich dziaržavaŭ.
Taksama praca Zajca źviazanaja z pastajannymi zabaronami na pastaŭki našaj pradukcyi ŭ Rasiju i nieabchodna niejak reahavać na heta. Sam ministr abvinavačvaŭ Raśsielhasnahlad ŭ padtasoŭcy vynikaŭ łabaratornych daśledavańniaŭ. A taksama abiacaŭ kiraŭniku Raśsielhasnahlad Dankviertu, što jaho nie aryštujuć, kali toj pryjedzie ŭ Biełaruś.
Siarod svaich dasiahnieńniaŭ Leanid Zajac nazyvaŭ raźvićcio vytvorčaści małaka dy miasa i adno ź lidzirujučych miescaŭ Biełarusi pa eksparcie hetych praduktaŭ.
Recha abasranych karovaŭ
Łukašenka adčytvaje Zajca.
Ministr sielskaj haspadarki — heta ŭvohule vybuchovaja pasada. Ni ŭ adnym viedamstvie kiraŭniki nie miajanialisia tak časta, jak tut. Zajac byŭ dziasiatym ministram. Ale nichto da jaho tak doŭha nie znachodziŭsia ŭ hetym kreśle.
Mabyć, Leanid Zajac i dalej moh by być ministram, kali b nie pajezdka Łukašenki ŭ haspadarku «Kupałaŭskaje» Škłoŭskaha rajona. Kiraŭnika dziaržavy tak aburyli karovy, jakija znachodzilisia ŭ hnoi, što jon paraŭnaŭ hetuju haspadarku z Aśviencimam.
U vyniku pasadaŭ pazbavilisia vice-premjer Michaił Rusy, staršynia Mahiloŭskaha abłvykankama Uładzimir Damanieŭski, a taksama ministr sielskaj haspadarki Zajac.
Praŭda, biez pracy Zajac pabyŭ zusim niadoŭha. Ad 1 krasavika jon staŭ staršynioj Mahiloŭskaha abłvykankama.
Dačka pracuje na «Intehrale»
Natalla Łahunovič — dačka Leanida Zajca. Fota z «Adnakłaśnikaŭ».
Raniej ministr žyŭ u vialikaj trochpakajoŭcy pa vulicy Varanianskaha ŭ Minsku. Heta dom, u jakim atrymali kvatery šmat jakija čynoŭniki. Ciapier kvatera naležyć jahonaj dačce Natalli. Joj 36 hadoŭ. Jana pracuje viadučym inžynieram na pradpryjemstvie «Intehrał».
Svajho muža — Alaksandra Łahunoviča — Natalla sustreła ŭ Maładziečnie. Jon krychu maładziejšy za žonku. Hulaje ŭ chakiej u načnoj lizie ŭ Minsku. U pary jość dačka.
