Raniej adbirali pašparty, kab nikudy nie mahli trapić. Ciapier inšaje pryhonnaje prava. Čałaviek maŭčyć 10 hadoŭ jak toje bydła. Piša Mikałaj Rybakoŭ z Kopysi.
Lenincy, stalincy kaliści vieryli, što mahčyma vyraŭniać viosku i horad. Sapraŭdy, vioska vymiraje, nasielnictva horadu ŭzrastaje, voś i liču, što zastanucca adny harady.
Hledziačy na TV śćvierdžańni čynoŭnikaŭ pra toje, što sabrali vielizarny ŭradžaj zbožža i 9 młn ton bulby, dyk niejak śmiešna stanovicca. Vahon uzdoŭž 20 m, vaha 60 ton, dyk voś treba 150000 vahonaŭ, ciahnik dlinoj 3000 km, stolki ž pa bulbie, karaciej kažučy, bulby i ziernia sabrali stolki, što ciahnik dlinoj ad Bresta praktyčna da Uładzivastoka. Dy chto sabraŭ — śpityja ŭłaśniki, staryja piensijaniery, milicyjaniery dy čynoŭniki. Voś heta praca. Padman dy i tolki. Voś dziaržava chvalicca, što padtrymlivaje svajho vytvorcu. Padtrymka 13 tryljonaŭ rubloŭ. Padzialu na 2200 rubloŭ. Atrymałasia 5,5 miljardaŭ dalaraŭ, stolki kolki było zołatavalutnych srodkaŭ u Nacbankie. Karaciej kažučy, zaryli ŭsie zołata‑valutnyja srodki ŭ ziamlu, a addačy — nul. Kožny hod zavozim uviesnu morkvu, buraki, cybulu pa niatannych cenach. Voś dziaržava niepakoicca ab padtrymcy ŭłasnych haspadarak.
Pozna! Adbili ŭ čałavieka achvotu pracavać na ziamli.
Kali ŭłaśnik zdaść 999 litraŭ małaka, dziaržava dapłacić 30000 biełaruskich rubloŭ. Vielmi mahutnaja padtrymka — na 1 litr vychodzić 30 rubloŭ, mieniej čym kaštuje karabok zapałak. Voś heta padtrymka.
Raniej u našym miastečku było 110 hałovaŭ karovaŭ, zastałosia 6.Liču praz 5‑6 hod vučniam pieršych kłasaŭ buduć pakazvać karovaŭ navat u bukvary, a haradžanie buduć mierkavać, što małako vyrablajuć z nafty.
Śpivajecca vioska. Dastatkova zajści ŭ miascovuju kramu. Vino, harełka, piva zajmaje bolšuju płošču miascovych kramaŭ. Čamu tak adbyvajecca? Liču, pa pieršaje heta forma ŭłasnaści. Panabudavali šmat ahraharadkoŭ. Častka nie zasielena ni kim. A tyja, što zasielenyja — u ludziej niama radaści, biezvychodnaść.
Raniej adbirali pašparty, kab nikudy nie mahli trapić. Ciapier inšaje pryhonnaje prava. Čałaviek maŭčyć 10 hadoŭ jak toje bydła, žyvioła.Dyrektary ahraharadkoŭ panujuć, tamu što ludzi maŭčać, bo skazaŭ słova raźvitaŭsia z pracaj i žytłom. Inšy čas, a mietady pryhonnaha prava zastalisia tymi ž. škada, što źnikła takaja źjava jak tałaka, ciapier kožny sam pa sabie.
Usie my rodam ź dziacinstva, a jašče ŭsie my rodam ź vioski. Vioska raniej bdziła ab maralnych ustojach žyćcia, ciapier ich navat nie kamu bluści.
Moładź źjazdžaje, na vioscy adny piensijaniery i śpityja spadary. Heta ŭ Niderłandach 1 adsotak nasielnictva kormić usiu krainu, i chapaje na ekspart pa ŭsim Jeŭrasajuzie. Prezident tolki abiacaje hnać čynoŭnikaŭ u Hałandyju. Ja b paraiŭ Vam samomu źjeździć dy pabačyć svaimi vačyma, tym bolš što da krasavika 2009 heta mahčyma zrabić. Viedajecie, pustazielle spačatku raście ŭ «hałavie», a potym u navakolnym asiarodku, jakija raniej byli palami i ŭłasnymi nadziełami.
Jak zaŭsiody ŭźnikaje pytańnie «što rabić?». Dy addavać ziamlu va ŭłasnuju haspadarku tym ludziam, chto jašče maje siły, zdaroŭje, kab źmianić dumku asnoŭnaj kolkaści hramadstva pra toje, što, pracujučy na ziamli, nie budzieš bahaty, a budzieš harbaty.
